ضريح جمال عبد الناصر

مش كل القبور طوب و حجارة 

فيه قبور مليانة نور

يشفي من هم الصدور 

قبور بتحضن الاشتياق 

و اللي م الغيبوبة ضاق

و اللي لسه بيتألم ...

بص شوف مين ساكنها 

و أنت تعرف هي ساكتة و لا راقدة 

و لا لسه مادة ايدها 

تسند اللي جاي قاصدها

رغم حاجز الفراق 

مش مصدقني ! خلاص 

روح بعينك شوف و عاين 

أد إيه الحب باين 

شايل من ورد الجناين 

جوه كل وردة كلمة 

خارجة من حرقة و ضلمة

تبكي في حضن اللي حضنه 

لسه بيساعي الجميع 

هو ده ضريح جمال ..

في الضريح دموع و آهه 

و  ابتسامة في بحر توهه

نفسها في بر الأمان ! 

يقصدوه ولاد بهية 

اللي جاي بقميص و بدلة 

و اللي لابس جلابية 

و اللي على كتفه الكوفية

قلبه خايف ع القضية

راح يقول لنفسه أنه 

فيه زعيم خالد كتب له 

أن اللي عاش من غير مبادئه 

مات ذليل من غير شرف !

شوف العرب اتفرقوا 

لكن هناك جوه الضريح 

اتجمعوا .. 

فاكرين كلامه و حميته 

الأمة هي قضيته

خدهم حنين عبد الناصر 

السنين تفني الجسد 

ايوا صحيح 

لكن الصوت اللي اتولد 

في ميدان فسيح 

صرخته تعيش للأبد 

تحيي بلد   تغرس وتد 

ده صوت جمال عبد الناصر  !

#نقاش_دوت_نت