وداعا للتفكير .. أهلا بالاستعمار الجديد
بقلم /منى سعيد
التطبيقات
الاستعمار الجديد مش دبابة
الاستعمار الجديد تطبيق على موبايلك
كل يوم بيقولك "هسهل عليك"
يكتب مكانك يفكر مكانك يبدع مكانك
وانت بتسقف وتقول الله على التطور
بس عمرك سألت نفسك
هو ليه كل التقنيات دي جاية من بره
والمقصود منها ايه
عايزين نكون مستخدمين ولا صانعين
عايزين عقلنا يبقى ملكنا ولا إيجار من
شركة بره
تصدير التقنيات من الغرب لينا الهدف منها شلل العقل
كل يوم بينزل تحديث جديد تطبيق جديد أداة جديدة بتقولنا "هتريحك"
من أول ما بنصحى للموبايل لحد ما بننام والذكاء الاصطناعي بيرد مكاننا
احنا فرحانين بالسرعة وبالسهولة بس محدش سأل نفس السؤال
هو ليه كل التقنيات دي جاية من بره وليه الهدف منها دايما اننا نستهلك مش نصنع
الغرب سبقنا بسنين في التكنولوجيا والذكاء الاصطناعي والسوشيال ميديا
وبيصدروا لنا كل حاجة جاهزة على الجاهز
تطبيق يفكر مكانك برنامج يكتب مكانك آلة تصمم مكانك
الشكل الظاهر انهم عايزين يسهلوا حياتنا
لكن الحقيقة اللي ورا الستارة أخطر بكتير
الهدف الحقي من التصدير ده ايه
الهدف الأول هو توقف العقل البشري
لما يتعود الإنسان ان كل حاجة بتيجي جاهزة بيبطل يسأل ويبحث ويجرب
المخ اللي كان بيتعب عشان يطلع فكرة بقى مستني البرومبت
ومع الوقت العقل بيصدي لأن العضلة اللي مش بتتمرن بتموت
الهدف التاني هو شلل التفكير
مش عايزين أمة بتفكر وبتخترع وبتحل مشاكلها بنفسها
عايزين أمة مستهلكة بتاخد وتستخدم وبس
طالب بياخد التلخيص جاهز مهندس بياخد الكود جاهز كاتب بياخد المقال جاهز
فبنطلع جيل شاطر في الضغط على زرار بس مش شاطر في انه يبني الزرار
الهدف التالت هو التحكم في عقولنا
اللي بيملك الأداة هو اللي بيملك القرار
هو اللي بيحددلك المعلومة اللي توصلك والفكرة اللي تظهرلك والإجابة اللي تقتنع بيها
بقينا بنفكر باللي بيقدمهولنا وبنتكلم بالطريقة اللي بيعلمهالنا
فبقى سهل جدا يوجه الرأي العام ويغير ثقافة ويطمس هوية واحنا فاكرين ان ده اختيارنا
ايه اللي بيحصل لنا دلوقتي
بقينا بنخاف نبدأ أي شغل من غير الأداة
الطالب مش عارف يحل من غير شات
الموظف مش عارف يكتب ايميل من غير مساعد
المبدع مش عارف يطلع فكرة من غير ما يقول "اديني 10 أفكار"
يعني بقينا عبيد للراحة وفي نفس الوقت عبيد للي صنع الراحة
والأخطر لو التقنيات دي وقفت يوم
هنكتشف اننا فقدنا أهم مهارة عند الإنسان وهي "اني اعرف اتصرف"
هنرجع لورا مش هنعرف نتقدم خطوة لأننا سلمنا مفاتيح التفكير لغيرنا
المشكلة مش في التقنية
التقنية نفسها مش حرام ولا غلط
المشكلة اننا بناخدها استهلاك مش صناعة
بناخدها عشان نريح دماغنا مش عشان نطور بيها دماغنا
الدول اللي بتتقدم هي اللي بتاخد التقنية وتفككها وتفهمها وتصنع زيها وأحسن منها
احنا بناخدها ونستخدمها ونصقف ونقول الله على السهولة
الغرب مش هيصدرلك سلاح يضربك بيه هيصدرلك راحة تخليك متضربش أصلا
راحة توقفك راحة تشل تفكيرك راحة تتحكم فيك من غير ما تحس
الحل مش اننا نرفض التكنولوجيا الحل اننا نمتلكها
نتعلمها نفككها نصنعها نطورها
نستخدمها كأداة في ايدينا مش هي اللي تستخدم عقولنا
لأن في الآخر اللي مش بيفكر هيتفكرله
واللي مش بيصنع هيتصنع له
واللي مش بيملك عقله هيبقى عقله ملك لغيره
عايزين نفضل أحرار ولا عايزين نفضل مستخدمين؟
#نقاش_دوت_نت
موضوعات ذات صلة
التعليقات
أضف تعليقك