الفصل الخامس: ظل يوسف
عادل التوني
يوسف بدأ يتغير قبل أن تلاحظ نوال حجم التغيير.
في البداية بدا الأمر غضبًا عابرًا. يعود من المدرسة، يلقي حقيبته على الأرض، يرفض الطعام، ثم يجلس قرب النافذة.
- مالك؟
- ولا حاجة.
ثم ينصرف قبل أن تبدأ الأسئلة.
نوال تعمل أكثر مما ينبغي، وسمية تحاول أن تعيد بناء حياتها، وصفاء تستعد لامتحاناتها، أما أخبار خالد فكانت تأتي متقطعة من بعيد.
في الوقت نفسه، بدأ يوسف يختفي لساعات أطول.
مساء شتوي، عاد بعد منتصف الليل.
كانت نوال قرب المصباح تصلح طرف قميص قديم. ما إن سمعت المفتاح حتى رفعت رأسها.
دخل يوسف وأغلق الباب.
- كنت فين؟
لم يجب.
رأى طبق العشاء، رفع الغطاء، ثم أعاده.
- مش عايز
- أنت ما أكلتش من الصبح.
- قلت مش عايز.
نظرت إليه. كان وجهه شاحبًا وشعره مبللًا.
- تعالى اقعد.
- تعبان
- من إيه؟
- استدار إليها.
- من الأسئلة.
دخل غرفته وأغلق الباب.
بعد أيام، بدأت أشياء صغيرة تختفي.
نقود من علبة المطبخ، ثم ساعة إبراهيم القديمة، ثم مبلغ كانت نوال قد احتفظت به لشراء القماش.
في المرة الأولى، أعادت حساباتها.
في الثانية، ظنت أنها نسيت.
أما في الثالثة، فأخرجت المال ووضعته أمام يوسف.
- دول كانوا هنا.
نظر إلى المال.
- وبعدين؟
- اختفوا.
رفع عينيه إليها.
- يمكن إنتِ صرفتيهم.
- أنا؟
- أيوه.
- لو أخدتهم، قول لي.
سحب يده حين مدت يدها إليه.
- ولو أخدتهم يعني؟
- نشوف حل.
قال وهو يبتعد:
مفيش حل.
- يا أبني لكل حاجة حل.
دخل غرفته.
ولم تلحقه أمه.
في الأيام التالية، كانت تراه يخرج ويعود، وفي جيبه أشياء لا تعرفها، ووجهه يزداد شحوبًا.
بعد أسابيع، رآه أحد الجيران مع شابين أكبر منه قرب مقهى قديم
في آخر الزقاق.
حين مر الرجل، سكتوا.
وفي المساء، انتظرت نوال يوسف حتى عاد.
- إنت بتقعد مع مين هناك؟
توقف.
- مين قال لك؟
- جاوبني.
- ناس أعرفهم.
- مين؟
- هو تحقيق؟
- أنا أمك.
- وأخويا خالد كان ابنك برضه.
خالد كان له كل حاجة إلا أنا.
- خالد اختار طريقه.
- طول عمرك بتقولي اصبر. خالد هرب، وسمية اتجوزت وطلقت، وصفاء عندها طريقها... وأنا؟
نوال لم تجب.
يوسف خرج من البيت..
وحين عاد يوسف، انتظرت حتى أكل، ثم قالت:
كان فيه واحد اسمه عماد جه يسأل عليك من مدة.
توقفت الملعقة في يده.
- وماله؟
- بيقول إنك عارفه.
- يمكن.
- بتشتغل معاه؟
- شغل شغل
- شغل إيه؟
ضرب الملعقة على الطبق.
- هو لازم كل حاجة أقولها لك؟
- طول ما إنت ابني، آه.
- أنا مش طفل.
مين قال إنك طفل؟
أنت ابني وحبيبي.
إنتِ مش فاهمة حاجة.
تركها يوسف لينام.
قبل الفجر بقليل، استيقظت نوال لتصلي، فسمعت طرقًا عنيفًا على الباب كاد أن يخلعة من مكانه.
فتحت...
كان رجال من الشرطة.
- أنت نوال ؟
- نعم
فين يوسف؟
تراجعت خطوة.
ابني نايم.
دخلوا وأيقظوه.
ظهر يوسف عند الباب وهو يرتدي حذاءه.
كان أحد الرجال يحمل كيسًا صغيرًا.
- ده بتاعك؟
- نظر يوسف إليه، ولم يجب
- رد .. الكيس دا بتاعك؟
يبقي لازم تيجي معانا.
اقتربت نوال.
- ليه؟ ماهو قال مش بتاعه.
- الكيس تبعه ياست.
لم يطل الرجل الشرح
وقفت نوال أمام يوسف.
- بص لي
رفع عينيه إليها.
- عملت إيه؟
- مفيش حاجة.
- قول لي عملت إيه.
سكت.
مدت يدها إليه، فسحب يده.
- يلا .. مش ناقضين عطلة ياست.
ابنك عارف انه بيتاجر في المخدرات هو والشقي عماد الدوكش.
هات ايدك ألبسك الكلابشات.
مد يوسف يده وخرجوا جميعًا.
لحقت به نوال إلى أول الزقاق.
- يا يوسف.
توقف والتفت.
عملت إيه يا ابني؟
عملت إيه؟
في أول زيارة للسجن، أخذت معها كيسًا فيه ملابس وطعام.
جلس يوسف خلف الحاجز الحديدي.
وضعت يدها على فمها حين رأته.
- إنتِ جيتي ليه؟
- عشان أنت ابني.
- ما كانش لازم تتعبي نفسك
-أنا لو ما أتعب لولادي هاتعب لمين؟
مش هسيبك. بس لازم تساعد نفسك.
سكت.
ثم سألها عن صفاء وسمية.
- بخير يا أبني.
- أكيد بيكرهوني.
- محدش قال كده.
صمت .. وترقب .. ثم:
- خالد هرب... وأنا بقيت لوحدي.
- إنت ما كنت لوحدك. كنت في البيت.
- البيت ده كان خالد.
- ممكن أكون قصرت معاك.
ممكن ما فهمتكش.
ممكن ماسمعتكش.
- ممكن .. يا أمي.
- أنا مش هقدر أحميك من نفسك.
- أنا عارف.....
(الزيارة انتهت)
دخل يوسف محبسه.
وبقيت نوال لحظات في مكانها.
بدأت تبحث عن محامٍ معرفة.
بحثت عما ما تحتفظ به من مال، فلم يكفِ.
في إحدى الليالي، جلست أمام صندوقها الخشبي وأخرجت خاتم زواج لبنتها.
جاءت صفاء.
-هتبيعيه؟
- لازم نجيب محامي.
أخوكي هايضيع.
- أخويا ضيّع نفسه يا أمي.
في الصباح، ذهبت إلى الصاغة.
وضعت نوال الخاتم على الطاولة، وأخذت المال.
لم تقل شيئًا، وانصرفت.
في المحكمة، وقف يوسف خلف القفص.
كانت نوال تجلس في آخر القاعة.
وحين انتهت الجلسة، رفع رأسه إليها.
وعلمت أنه سيودع سجن الأحداث.
شاورت له، وودعته.
رجعت نوال من المحكمة منهكة القوى.
دخلت نوال غرفة الأولاد.
كان سرير يوسف غير مرتب، وكتاب قديم على الأرض، رفعت الوسادة، فوجدت ورقة مطوية.
فتحتها.
بها جملة واحدة:
(أنا مش عايز أكون زي خالد)
أعادت الورقة مكانها.
مرّت الشهور ببطء.
في السجن، بدأ يوسف يعمل في ورشة صغيرة، وتعلّم من رجل اسمه كمال كيف يمسك الخشب ويصبر عليه ويجعل منه أشكلًا.
في إحدى الزيارات، أعطاها قطعة خشب صنعها بيده.
أمسكتها.
فرحت نوال بها.
- عملتها إنت؟
- أيوه.
وبتحب الشغل ده؟
هز رأسه.
هشتغل فيه لما أخرج.
نظرت إليه.
- البداية لوحدها مش كفاية.
- نعم ياأمي.
عادت نوال إلى البيت، ووضعت القطعة الخشبية فوق ماكينة خياطة قديمة استأجرتها لفترة.
في دفترها كتبت كعادتها:
(لن أعيش حياته بدلًا منه. لكنني سأظل أفتح له الباب)
حين سألتها صفاء:
هو هيتغير؟
نظرت نوال إلى قطعة الخشب.
- تقريبًا .. لكن هنشوف.
في آخر الليل، كان يوسف مستيقظًا خلف القضبان، يقلب قطعة خشبية أخرى بين يديه، بينما يريه كمال كيف يمسك الأداة.
ولأول مرة منذ اعتقاله، لم يكن يوسف يفكر في الهرب.
كان يفكر في شيء أصعب.
كيف يعود.
#نقاش_الإخباري
موضوعات ذات صلة
التعليقات
أضف تعليقك