من نحن اتصل بنا سياسة الخصوصية
×

الفصل الثامن: نوستالوجيا عائلية

عادل التوني
الفصل الثامن: نوستالوجيا عائلية


كان دفتر نوال قديمًا إلى درجة أن أحدًا لم يكن يلتفت إليه.

غلافه بنيّ، بدأت أطرافه تتشقق، وصفحاته امتلأت على مر السنين بأشياء متفرقة: أرقام، ومواعيد، وأسماء، وديون، وملاحظات صغيرة كتبتها نوال ثم تركتها

في الصفحات الأولى كانت حسابات البيت: ثمن القماش، وأجرة الكهرباء، ومبلغ اقترضته من أمينة، ومصروف المدرسة، وثمن دواء.

ثم تظهر أسماء أبنائها الأربعة، وبجوار كل اسم كلمة أو جملة.

خالد... مدرسة.

سمية... كتب.

يوسف... مشكلة.

صفاء... كشف طبي.

وفي صفحات أخرى، كانت نوال تكتب ما لم تستطع أن تقوله لأحد؛ رسائل لم تُرسل، وأسئلة بلا إجابات، وأحيانًا سطرًا واحدًا ثم تتوقف.

بعد عودة خالد، بدأ البيت يتغير ببطء.

يذهب كل صباح إلى ورشة أبي رامي ويعود عند الغروب. أحيانًا يحمل معه خبزًا أو فاكهة، وأحيانًا يعود خالي اليدين.

في إحدى الأمسيات، دخلت نوال غرفتها تبحث عن فاتورة كهرباء قديمة. فتحت الصندوق الخشبي، فوجدت الدفتر.

جلست على طرف السرير، وقلبت صفحاته حتى توقفت عند اسم خالد.

تحت الاسم:

(أخذ المال ووقّع بدلي)

(خرج من البيت ليلًا. لا أعرف أين هو)

(يقول إنه سينجح)


ظلت لحظة، تنهدت، أغلقت الدفتر.

دخلت سمية دون أن تطرق الباب.

ـــ ماما، إنتِ هنا؟

ـــ آه.

ـــ كنتِ بتكتبي؟

ـــ حسابات.

ـــ وريني.

ضحكت نوال:

ـــ عشان أتأكد إنك ما حسبتيش عليّا مصاريف المدرسة وإنتِ صغيرة؟

ـــ أنا بالذات كنت أرخص واحدة.

ـــ كدابة، كلكم غاليين على قلبي.

جلست سمية ومدت يدها نحو الدفتر، فسحبت نوال يدها:

ـــ بعض الأشياء لا تحتاج أن تُحكى... يكفي أن تبقى في مكانها.

وضعت نوال الدفتر في الصندوق وأغلقته.

 

في اليوم التالي، كان خالد في الورشة يصلح بابًا خشبيًا مع أبي رامي.

دخل رجل إلى الورشة، وصافح أبا رامي.

ـــ أهلًا يا أستاذ شاكر.

ثم أشار أبو رامي إلى خالد:

ـــ خالد إبراهيم، المعلم الصغير. ابن المرحوم إبراهيم الإسكندراني الله يرحمه..

نظر شاكر إلى خالد لحظة، ثم قال:

ـــ خالد ابن نوال؟

ـــ أيوه.

ـــ والدتك ست طيبة، الله يرحم والدك.

ـــ الحمد لله.

تحدث شاكر مع أبي رامي وانصرف.


سأل خالد:

ـــ تعرفه؟

ـــ اعرفه من بعيد.

توقف خالد لحظة، ثم سأل:

ـــ شاكر؟

ـــ أيوه. له شغل في القروض والحسابات، ويعرف ناس كتير في المنطقة.

 

في المساء، سأل خالد أمه.

ـــ ماما، تعرفي واحد اسمه شاكر؟

تغير وجهها قليلًا.

ـــ ليه؟

ـــ جه الورشة.

ـــ قال لك إيه؟

ـــ ولا حاجة. سلم علي وترّحم على والدي.

سكتت نوال.

ـــ ما تتعاملش معاه.

ـــ ليه؟

ـــ من غير ليه.

ـــ ماما، أنا مش طفل.

ـــ بعض الناس ما ينفعش الواحد يفتح لهم باب.

نظر إليها خالد

ـــ هو يعرفنا من زمان؟.

لم تجب.

وضعت يدها على كتف خالد.

ـــ بعدين يا خالد.

 

في تلك الليلة، كان يوسف يبحث عن ورقة تخص عمله. دخل غرفة أمه، فرأى الدفتر فوق الطاولة. مد يده ليبعده عن الحافة، فسقط على الأرض وانفتحت صفحاته، توقفت عيناه عند اسمه:

(يوسف يأخذ فلوسًا من البيت. لا أعرف ماذا أفعل معه)

(اليوم ضرب زميله في المدرسة، ثم قال إن خالد أخذ كل شيء معه)

(أحاول أن أجلس معه، لكنه يخرج)

وفي سطر قصير:

(وجدت في جيبه ورقة باسم عماد)

رفع يوسف رأسه.

دخلت نوال، فرأته والدفتر في يده.

ـــ إنتِ كنتِ عارفة؟

ـــ عارفة إيه؟

ـــ عارفة إني كنت بضيع؟

جلست نوال ببطء.

ـــ كنت شايفة.

ـــ وشُفتي... وما عملتيش حاجة؟

ـــ حاولت.

ـــ حاولتي؟

ـــ حاولت.

ظل واقفًا لحظة:، 

ـــ أنا كنت بشوفك كل يوم بتجري بين الشغل والبيت. خالد غايب، وسمية عندها مشاكل، وصفاء لسه صغيرة... إنتِ كنتِ شايلة الدنيا كلها.

ـــ لكن ما كنتيش شايفاني.

خفضت نوال عينيها.

ـــ يمكن.

ـــ أنا كنت مستنيكي تشوفيني يا ماما.

جلس إلى جوارها.

ـــ ليه ما قولتيليش إنك كنتِ عارفة؟

ـــ كنت خايفة عليك.

ـــ وخوفك عليّا خلّاني أوصل للسجن.

أطرقت نوال، وامتلأت عيناها بالدموع.

ـــ كنت فاكرة إني لو قربت منك أكتر... هقدر أرجعك.

نظر إليها طويلًا.

ـــ وأنا كنت محتاجك تقربي.

رفعت نوال عينيها إليه.

ـــ سامحني يا يوسف.

ـــ وأنا كمان بلوم نفسي. يمكن لو اتكلمنا وقتها، كان حصل حاجة مختلفة.

ـــ يمكن

ابتسم يوسف ابتسامة صغيرة.

ـــ الكلمة دي بتضايقني

مسحت نوال دمعتها.

ـــ وأنا كمان.

ـــ بس ما تخبيش الدفتر تاني.

ـــ مش هخبي عنك حاجة تاني.

نظر إليها يوسف لحظة، ثم مال برأسه على كتفها.

وضعت نوال يدها على شعره.

لم تقل شيئًا.

لأول مرة منذ سنوات، لم تحاول نوال أن تصلح شيئًا.

اكتفت بأن تحتضن ابنها بصمت.

 

اجتمع الأبناء الأربعة حول المائدة.

سمية تنظر إلى يوسف:

ـــ في إيه؟

ـــ قريت دفتر ماما؟.

ـــ فعلًا ماما عندها دفتر كاتبة فيه كل حاجة.

دخلت نوال في تلك اللحظة، ووضعت صينية الشاي على المائدة.

ـــ كان نفسي ما تعرفوش

عشان في حاجات مش عايزة أفضل أشرحها

خالد:

ـــ زي إيه؟

نظرت إليهم نوال لحظة، ثم قالت:

ـــ اقعدوا.

وضعت الدفتر في منتصفهم.

ـــ اللي هيقرأ، يقرأ للكل.

وابتسمت نوال ابتسامة خفيفة

 

كانت أول الصفحات تعود إلى السنوات التي تلت وفاة إبراهيم.

قرأت سمية:

 ـــ مات إبراهيم.

الدين 430 جنيهًا.

متأخرات سداد.

خالد يريد أن يذهب مع عمه.

بعت الدهب. دفعت الدين. اشتريت قماشًا.

رفع خالد عينيه إليها:

ـــ إنتِ ما قلتيليش إنك بعتي الدهب.

ـــ كنت محتاجة الفلوس.

ـــ وكنتِ بتقولي إيه لما أسألك؟

ضحكت نوال.

ـــ كنت بتسأل السؤال ده كل يوم.

ـــ وما جاوبتينيش.

ـــ كنت بقول لك: لما تكبر.

ـــ وأنا كبرت

ـــ علشان كده بتسمع دلوقت.


قلب يوسف الصفحة.

امتلأت الصفحات التالية بأرقام صغيرة وحسابات متكررة.

ـــ إنتِ كنتِ بتكتبي كل حاجة؟

ـــ تقريبًا.

ـــ حتى القروش؟

ـــ القروش كانت بتفرق.


واصلت سمية القراءة حتى وصلت إلى سنة1997 : 

خالد يقول إنه لن يعيش هنا.

سمية تحتاج كتبًا.

يوسف لا يذاكر.

صفاء تكتم تعبها.


رفعت صفاء رأسها

ـــ صفاء كانت تعبانة وقتها؟

ـــ حاجة بسيطة.

ـــ ما كانتش بسيطة.

نظرت إليها نوال.

ـــ ما كنتيش عايزة تقلقيني؟

ابتسمت صفاء.

ـــ ما كنتش عايزة أزعلك.

نظر يوسف إلى أمه.

ـــ كل واحد فينا كان عنده طريقة يخبي بيها عنك.

قلبت سمية الصفحة.

ظهر اسمها:

ـــ سمية تريد أن تكمل تعليمها.

العائلة تقترح زواجها من سامر.

توقفت.

ـــ إنتِ كنتِ رافضة من الأول؟

ـــ أيوه.

ـــ طب ليه وافقتِ بعدين؟

ـــ لأنك قلتي إنك موافقة.

ـــ لكن إنتِ كنتِ شايفة حاجة أنا مش شايفاها.

ـــ كنت شايفة إنه بيتكلم كتير عن نفسه، وقليل عنك.

ـــ وليه ما قلتيليش؟

ـــ قلت لك: فكري كويس.

ـــ كان ممكن تمنعيني؟

ـــ كان ممكن، لكن قلِت: نجرب.

ـــ صح.

ـــ نقول الحمدلله.

ـــ الحمدلله.

أغلقت الصفحة ودفعتها إلى يوسف

ـــ كمّل إنت.


خالد:

ـــ فين الصفحة بتاعتي؟

ابتدى يوسف القراءة.

ظهرت جملة بالحبر الأزرق:

خالد طلب مالًا. لم أقل له من أين جاء.

تغير وجه خالد.

ـــ إيه ده؟

قلب يوسف الصفحة:

استلفت من شاكر.

ـــ شاكر؟

ـــ أيوه

ـــ استلفتي منه عشاني؟

ـــ عشان المدرسة

ـــ مدرستي؟

ـــ أيوه.

سكت خالد لحظة

ـــ كنت عايز فلوس للرحلة.

ـــ عارفة.

ـــ وما كانش معايا.

ـــ وأنا ما كانش معايا.

ـــ وسددتيه؟

ـــ جزء منه، لكن تعرف شاكر عمل إيه بعدها؟

ـــ أعرف منين؟

ـــ كمل يا يوسف.


انتقل يوسف إلى الصفحة التالية.

الحاجة أمينة دفعت جزءًا.

بعت الساعة.

شاكر ما زال له مبلغ.

رفع خالد رأسه.

ـــ وإمتى خلصتي الدين؟

ـــ بعد سنتين

نظر يوسف إلى والدته..

ـــ يعني شاكر فضل له فلوس عندنا كل السنين دي؟

ـــ له دين في رقبتي.

قلب خالد الصفحات حتى وصل إلى تاريخ قبل هروبه بعام.

شاكر يقول إن الدين زاد.

ـــ ده الدين اللي أنا مضيت عليه؟

هزت رأسها نوال.

ـــ وإنتِ كنتِ عارفة؟

ـــ عرفت بعد ما وقعّت على الأوراق.

ـــ وليه ما قولتيليش؟

ـــ كنت عايزة ألحق الموضوع.

ظل ينظر إليها.

ـــ إنتِ اللي سددتي؟

ـــ أيوه

ـــ منين؟

توقفت نوال لحظة.

ـــ بعت الماكينة

ـــ ليه؟

ـــ عشان ما تدخلش في قضية

ـــ أنا كنت فاكر إنك بعتيها عشان صفاء

ـــ بعتها عشانك


ظل يوسف يقلب الصفحات، ثم سأل:

ـــ وفي حاجة تانية؟

رفعت نوال عينيها إليه.

ـــ يووووو ؛ كتير.

ـــ بس مش كله بيتقال في يوم واحد.

ضحك الجميع.

ظل الدفتر مفتوحًا في منتصف المائدة

الجميع:

ـــ بكرة نكمل؟

نظرت نوال إليهم

ـــ بكرة نتكلم.

#نقاش_الإخباري 

التعليقات

لا توجد تعليقات بعد

أضف تعليقك

12121
سيتم مراجعة تعليقك قبل نشره للتأكد من التزامه بقواعد المجتمع.