زلزال فرنسا

‏

من شوية حصل زلزال سياسي في فرنسا، والحكومة الفرنسية كلها سقطت... وبالتوازي مع ده، نتنياهو دلوقتي بيهدد سكان غزة بالرحيل قبل بدء "العملية الكبرى"!

 أيه اللي حصل بالضبط في الكام ساعة اللي فاتوا؟!

_ خلينا نبدأ بفرنسا... البرلمان الفرنسي من ساعات صوّت بأغلبية كاسحة لسحب الثقة من حكومة رئيس الوزراء "فرانسوا بايرو"، وأجبروه يقدم استقالته بعد 9 شهور بس من بقائه في المنصب...

طب ليه؟!

السبب المعلن في تصويت سحب الثقة ده، كان بسبب خطته التقشفية اللي قيمتها 44 مليار يورو، اللي فجرت الغضب الشعبي والرفض السياسي...

_ الخطة دي اقترحها "بايرو" عشان الأوضاع الاقتصادية في فرنسا بقالها فترة بتمر بمرحلة كارثية... الديون اللي على البلد تخطت حوالي 3.35 تريليون يورو، وكلفة الاقتراض وعوائد السندات الفرنسية بقت أعلى من إسبانيا والبرتغال واليونان اللي كانوا زمان في قلب أزمة اليورو... ووكالات التصنيف دلوقتي بتهدد بخفض تصنيف فرنسا الائتماني خلال أيام... وعشان كده حصل قلبان ضد الحكومة، والبرلمان كمان متفكك ومش متحد إطلاقًا...

طب ده معناه أيه؟!

 _ معناه إن فرنسا دلوقتي من غير حكومة مستقرة، وماكرون مضطر يعيّن رئيس وزراء جديد خلال أيام، لكن كل الخيارات قدامه “كأس مسموم” زي ما الإعلام وصف... وبقاءه هو نفسه دلوقتي أصبح مهدد، بسبب تفكك البرلمان والغضب الشعبي اللي عمال بيزيد ضده...

لكن الأخطر من كل ده هو إن سقوط الحكومة جاي قبل أيام من خطوة تاريخية كان بيخططلها ماكرون، بإنه يعلن اعتراف فرنسا أخيرًا بالدولة الفلسطينية.. وهو ده السبب الحقيقي في الحرب الشعواء اللي بيتعرضلها هو وحكومته دلوقتي!

_ طيب ليه الموضوع ده أخطر من مجرد أزمة سياسية؟

لأن سقوط الحكومة ده بيدي فرصة كبيرة لليمين المتطرف إنه يسيطر على البرلمان ويوصل للحكم بقيادة حزب مارين لوبان، اللي هي متطرفة يمينة زيها زي نتنياهو وترامب بالضبط، كإنها فولة واتقسمت نصين.. وبتتبنى نفس الآراء والمواقف بالضبط...

_  المشكلة كمان ان لوبان واليمين عموما موقفهم الرسمي هو انها بيعتبروا الاتحاد الأوروبي مشروع فاشل، وعايزين يوقفوا الدعم لأوكرانيا ويتخارجوا بالكامل من دعمها عسكريا واقتصاديًا، ويتقاربوا مع روسيا وبوتين وسياسة ترامب… 

وعشان كده فلو مسكوا الحكم، ده ممكن يكون الشرخ الأكبر في الاتحاد الأوروبي من أيام تأسيسه، وممكن يؤدي لتفككه بالكامل، ويزيد من الاحتقان والغليان اللي حاصل في أوروبا اللي هي أصلًا مش ناقصة وبتحضر لحرب محتملة السنة الجاية زي ما حكيتلك في المقالات اللي فاتت...

_ وعلى الناحية التانية من العالم، وفي نفس اللحظة اللي فرنسا فيها بتغرق في أزمتها السياسية دي، ترامب امبارح كان مقدم عرض جديد لوقف اطلاق النار في غزة، والمقاومة كانت وافق عليه... بس قبل ما يكمل، حصلت النهارده حاجتين غالبًا كده نسفوا أي فرصة لأي اتفاق أو تفاوض...

أول حاجة هي ان المقاومة نفذت عملية في شمال غزة، قدروا من خلالها يفجروا دبابة إسرائيلية في جباليا، وقتلوا أربع جنود اسرائيليين حرقًا جواها... وبعدها مباشرةً حصلت عملية اطلاق نار في القدس اتقتل فيها 6 اسرائيليين...

_ رد نتنياهو بعدها كان إنه أطلق تحذير نهائي للمدنيين الفلسطينيين الباقيين في مدينة غزة بإنهم: "يغادروا قبل بداية العملية الكبرى"، اللي بيقول عنها انها هتدمر كل شيء باقي في القطاع... وده مش مجرد كلام، عشان بالفعل خلال اليومين اللي فاتوا جيش الاحتلال دمّر 50 برج سكني تقريبًا بالقصف والروبوتات المتفجرة، وحاليًا بيجهز لاجتياح بري واسع...

_ وللأسف في وسط كل ده، سقوط حكومة فرنسا ومحاصرة ماكرون بيحيد من الساحة لاعب كان ممكن يغيّر المعادلة بوقوفه مع الاعتراف بفلسطين، وده هيخلي يد نتنياهو منطلقة أكتر... والله أعلم كده ايه اللي هيحصل، وهل الاعتراف الأوروبي بالدولة الفلسطينية هيتم فعلا ولا لأ، وهل أصلا هيبقى فارق ولا زي قلته...

#نقاش_دوت_نت