السياسة .. فن الكائن

فيه نقطة فلسفية مهمة لازم تتفهم في الحياة بشكل عام وفي السياسة الدولية بشكل خاص، طالما قررت " التفاوض" فانت خرجت من مساحة ( العدل، الحق، القانون) إلى مساحة توازنات القوة! بعبارة أخرى، نتائج التفاوض مش الوصول إلى الحق وإنفاذ القانون وإقامة العدل، لكن الهدف من التفاوض ببساطة هو الحصول على أفضل المكاسب الممكنة في ضوء توازنات الأطراف المتفاوضة أو بمعنى أدق، محاولة تحقيق أكبر قدر ممكن من المكاسب في محاولة لتقليل الخسائر وتقليل الفجوات الخاصة بالقوة لكل طرف!

أنا بقول ده مش علشان أقول ان خطة غزة المطروحة حلوة أو لازم تتقبل، لكن بقوله علشان ناس كتير من اللي بتعلق على بنود الخطة بتتكلم عن عدم عدالتها وعدم تضمنها كذا أو كذا فبلفت النظر ان هو ده معنى التفاوض ببساطة طالما إن الطرفين المتفاوضين غير متكافئين!

ولازم نعرف إن ده طول الوقت معضلة ناس كتير مع السياسة، انهم بيتعاملوا معاها من زواية " ما يجب أن يكون" في حين انها تقتصر على ما هو كائن بالفعل!

#نقاش_دوت_نت