المسكوت عنه في دراسات الجدوى

حضرتك هتقبل إننا نقولك ما تنفذش المشروع ؟

دا تقريباً أول سؤال بنسأله لأي عميل بيجي محتاج يعمل دراسة جدوى لمشروع لأن العرف السائد بين السواد الأعظم إنه بيعمل دراسة الجدوى علشان يعرف هيكسب إزاي وإمتى ؟

على مستوى دراسة الجدوى الجزئي والتفصيلي فيه كام نقطة لازم يكونوا على الشكل التفصيلي لأنهم المشكلة الأكبر اللى ممكن تخسر المشروع لأن الهدف الأكبر لأي مشروع هو الإستمرارية وليس الربحية 

1- مخاطر المنافسة :

كل واحد بيكون معتقد إنه جايب الديب من ديله فى الفكرة اللى بيعرضها أو بيكون مطمئن لو الفكرة ريادية أو خلينا نقول أكتر لو بيقوم المشروع على شراكة ذات نفوذ أو مع جهة ما هتساعد في المشروع وبيعتقد إن السوق هيكون تحت طوعة متناسي مخاطر المنافسة واللى للأسف الشديد أصبحت من المستهلك نفسه أكثر من منافس ظاهر على السطح ..

التعمق في دراسة المنافسين على مستوى القطاعات داخل أي مجال من الحاجات المهملة جداً حالياً في دراسات الجدوى أو تفكير صاحب المشروع ..

2- المخاطر التشريعية والتنظيمية :

وهناك ناس كتير بتقولك إحنا هنشتغل أو هنرخص ترخيص جزئي وبالتالي يقولك أنا مش محتاجها على إعتبار دا هيقلل من تكلفة الفلوس اللى هيدفعها فى الدراسة لكنه غير مدرك إنها مرتبطة بسير العمل بالكامل فى مشروعه بداية من المشتريات والمدخلات مروراً بالعملية التشغيلية وصولاً للمنتج ولها تأثير كبير فى إتخاذ القرار يكمل أو لاء .

3- المخاطر الموسمية :

وهنا بنتكلم بقى على المجال ككل والناس للأسف معتقدة إن المخاطر هنا مخاطر بيع فقط لا غير لكن الموضوع أعقد من كجرد البيع بيقل وهنرجع مع الموسم نعوض متانسي أصلاً المخاطر الزمنية السوقية فى الجزء دا من السوق 

4- الموانع البيئية :

ودي كتر ناس بتقع فيها اللي بيشوف مشروع في دولة أو سوق ويحاول ينقله لسوق تاني وكلمة بيئة هنا مقصود بيها البيئة الطبيعية او البيئة الإجتماعية والإقتصادية والسياسية وخلافة مش مجرد كلمة بية وهنعمل الصرف في الترعة ومحدش شايف ...

5- شخصية العميل نفسه :

ناس كتير بتعتقد لمجرد إنه معاه فلوس يقدر يفتح مشروع لكن جزء رئيسي من دراسة الجدوى هو دراسة شخصية العميل نفسه لأن لما بتعمل دراسة الجدوى من المشروع للعميل لازم تعملها عكسي من العميل للمشروع علشان تقول للمشروع الشخص دا ينفعك ولا لاء ...

في مصر معظم مكاتب دراسات الجدوى بتوصي بالتنفيذ لأن العميل اللى جاي لها معاه فلوس وطالما معاه فلوس فدا حلو جداً إحنا مش هنزعله ..

دي نقط بسيطة جداً والله من حاجات كتير الناس فتكون فاهمة دراسة الجدوى غلط بسببها وجاي على إعتقاد يالا اعمل دراسة علشان قولي هبقى ملياردير منين ؟ وحتى دي كمان عاوزها ببلاش 

#نقاش_دوت_نت