غمي عينيك

في نصيحه بنقولها للي بيروح الجيم، إنك لو عايز تشوف ضخامة جسمك وتحس بالفرق والتطور ماتبصش على جسمك في المرايه كل يوم لانك ببساطه عينك هاتتعود على التقدم الصغير اللي بيحصل يوم بعد يوم، بالتالي مش هاتحس بفرق كبير..

نفس فكرة لما تغيب عن حد صغير وتقابله بعد كام سنه وتتفاجيء انه كبر وطول وتستغرب..في حين انك لو عايش معاه وبتشوفه يومياً إحساسك بالفرق مش هايكون بنفس التأثير بتاع الغياب.. قِس على ذلك نتيجة تقدمك في تطويرك من نفسك أو العائد المادي من ورا شغلك..

 وارد تحس بإحباط لأن التقدم ضعيف..لذلك الأفضل تتجاهل واستمر وخليك مستمر وغمي عينك وودانك عن اي حاجه ممكن تعطلك او تثبط من عزيمتك..

"خد في وشك" و كمل طريقك و استمر استمر استمر لان الأيام بتعدي هوا والسنين بتجري.. 

في مثل بيقول: إنك لما بتزرع شجره وبتشوفها بعد خمس سنين وهي كبيره ومثمره..بتندم إنك مازرعتش ساعتها شجره تانيه جنبها...لأنك هاتكتشف إن الأيام عدت بسرعه والنتايج ظهرت أمامك! 

#نقاش_دوت_نت