موقفي السلبي من جبهة الإنقاذ
جيهان شعبان
أنا مشكلتي مش مع العمر.. وإن كان ده له دلالة.. لو نبيل الهلالي كان لسه عايش كنت أتمنى إنه يكون في حملة بتدافع عن المعتقلين
وموقفي السلبي من "جبهة الإنقاذ" مش نتيجة لإنهم كانوا ضد الإخوان.. منا كمان ضد الإخوان.. بس كنت عاوزة أمشيهم بالشارع أو بالصندوق.. "جبهة الإنقاذ" اختارت الدبابة
وأطراف الجبهة شاركوا في خارطة الطريق اللي رسمها الجيش بما فيها لجنة صياغة الدستور والوزارة.. وكلنا عارفين نتيجة ده إيه.. قبول محاكمة المدنيين عسكريا وحزمة قوانين مقيدة للحريات هي السبب في اعتقال اللي هم عاوزين يدافعوا عنهم دلوقت
أنا عندي موقف سلبي من نور الهدى زكي وكريمة الحفناوي مش علشان مبستلطفهمش.. لكن علشان الناس دي وقفت قصادنا واحنا بنحاول لآخر لحظة الحفاظ على حق الناس في الشارع.. وقفوا يستعدوا علينا الأهالي والأمن شايلين يفط وبيهتفوا "خونة" "أفرم يا سيسي".. اللي كان معناه حرفيا ساعتها إن ممكن أي حد فينا يتقتل أو يعتقل لسنين وجايين دلوقت يدافعوا عن المعتقلين
أنا معنديش حسابات شخصية ولا سياسية مع الناصريين.. أنا واحدة ساعدت في حملات حمدين لما كان بينزل نائب عن بلطيم.. وكنت في حملة ضياء رشوان لما كان مرشح المعارضة في نقابة الصحفيين وكنا شباب هنغير دولة.. ولفيت مع كمال أبو عيطة مصر شبر شبر وهو بيأسس نقابة الضرائب العقارية.. وعملتلهم جرنال.. ولما كنت في الاشتراكيين الثوريين كنا بنظم معاهم مؤتمر القاهرة.. ولما بقيت في تيار التجديد شاركنا في حملة سعد عبود لبرلمان 2010
أنا بيني وبين الناصريين ثورة مغدورة.. دم اتسفك.. وسنين راحت في السجون والمنافي هدر.. التيار ده خذلنا من أوله لأخره بسلطاته بباغنوجه بصحفييه ورسامي الكاريكاتير والفنانين.. لغاية الوزير الهمام اللي لسه حابس واحد في قضية رأي وجاي يعمل حملة للدفاع عن سجناء الرأي
كفاية قرف بقى إحنا سكتنا للناس دي كتير.. سكتنا على علاقتهم بأنظمة قمعية وعلاقتهم بالأجهزة الأمنية.. كفاية بقى ده في ناس دمها سال يا جماعة.. مش معقولة كمان هنستخدم في تجميلهم.. وتجميلهم دي أكتر كلمة مهذبة لقيتها
ده مش معناة إن ده كلام ينطبق على الناصريين نفر نفر.. في إستثناء بيثبت القاعدة.. ناس خدت مواقف محترمة واتشرفت اني اشتغلت معاهم زي.. عبد العزيز الحسيني.. محمود قنديل.. محمد علي.. فادي إسكندر.. حسام مؤنس...
حبيت أوضح بس.. علشان في ناس فاكرة إني منفسنة من الناصريين وجبهة الإنقاذ
الدبابة وجبهة الإنقاذ، حق الناس في الشارع، ثورة مغدورة
موضوعات ذات صلة
