"مارك"
جيهان النجار
في متل اليوم
دماغي يفور
ونبض القلب
يتدغدغ ويبقى كسور
ومارك يقول دي ذكرى من سنة فاتت
ومش مسؤول
بخط إيديك وأفكارك وحوارتك
وذكرى لاعترافاتك
مانيش مسؤول
ودي روحك وبصلاتك وطبق الفول ..وده جرحك وآهاتك ودا المحلول
مانيش مسؤول
كااااتب على حائط المحمول.. مانيش مسؤول
عن الخاين
ولا الغدار
ولا إللي العمر تاه منه
ولا إللي الحب لف وراه وسبق سنه
وعاش الليل غريب مجروح
ولا إللي قال دا مش مسموح
ولا عن فرحة البدايات
ولا القسوة وقطم الضهر في النهايات
ولا ليا في أي حوار
ولا هابحث عن الأسرار أنا بعلن عن الذكرى باقولك فاكر الفكرة !؟!
لأن النية مش ليا ولا هية عيونها إزاز
تخلى عينيك تكون شايفة صور ومجاز
عشان تقرا لغات العين لازم طبعاً ....تكون أستاذ
تكون فهمان......تكون دارس .تكون حارس
مافيش نية لفاعل خير ويبدأ فعله بكوارث
مافيش فارس
بألف قناع يخوض حربه عشان نزوة
ووطنه مشاع مافيش إجماع
على الكداب ولا فيه حب بيكَمِّل
تحت الضغط والإرهاب
مافيش فارس يكون نصاب ولا خداع
ولا المكسور هيلزم عم مارك بصاغ!!
صاحبنا مالوش غير اللايكات
ولا يعرف يترجم حب ولا يعرف مدى العلاقات
دا واد فاتح سوبر ماركت و عنده حاجات
ولا يهمه دا سوق جمعة ولا تلاتات
مارك مالوش غير الظاهر فلو طاهر
هتنسب كلمتك لله.
#نقاش_دوت_نت
مارك، نبض القلب ، طبق الفول، حائط المحمول
موضوعات ذات صلة
