تل الوحشة/ شعر إسلام شمس الدين

جربت أعوم 

فغرقت

جربت أدوب

 فطفيت

من قبل ما أتهجى الحروف صليت

وآمنت إن الطفي للسجَّار

واشمعنا يعني منير مش الحجار 

آمن بإن المريلة كحلي؟!

واشمعنا يعني السر بيبوح لي:

إن اللي كح في وشهم بشويش

داير يكح كح لي!

واشمعنا يعني الليل محاوطني 

عايش أنيسي ووحدتي شادة

جايز يطوِّل صبرنا لمدة 

ويقيم نهار السعد للعاشقين؛

المُغرمين: تايهين بلا مرسى 

بلا شُرَّاع

بلا دمعة سلام ووداع

ولا ليهم دليل وأتباع

ولا في الصهد يحميهم شرور الكلمة والقدحة

واشمعنا يعني الشمس مش واضحة

إلا لأولاد الهجير والريح

ضحكة عيونهم مرعبة كفحيح

واحنا الغلابة صبرنا تراويح

بنهد تل الوَحْشة بالأحلام

احنا الغلابة خطوْنا لقدَّام

مالناش طريق نحفر له أسامينا

ولا لينا ذكرى تمد يوم بينا

وتشيل عن الكهل الوجع واللوم

احنا الغلابة ضحكنا كام يوم

والباقي لأولاد الذوات بالكوم

أصحابنا واحنا المأمورين بالطوع

جايز يكون الكَحْ يوم ممنوع

جايز يكون الشط يوم مخلوع

جايز يطول الليل ولو أسبوع

لكن نهارنا خلاص أهه شقشق

والضحكة طالعة بعزم ما فينا

جربت أعوم عديت

جربت أدوب جلِّيت

ومركبي راخية الشُراع

جامعة الشوارد لاجل ما ترسى.

#نقاش_دوت_نت