قصيدة : قلب حافي

انا شفت جوة عنيكِ الفجر متكلبش

مستني دوره في مكتب التحقيق

والشمس غضبانة ما بتنورش

حتى النسيم رافض يسلم عـ القلوب

كل الحروف عاملة اعتصام 

واقفين في وحل التجربة

رافعين رايات الانهزام

سابوا الورق من غير نَفَس

من غير معاني للكلام

البحر قرر يلعن الأمواج 

والحلم شافه من بعيد غرقان

والاغنيات البكر فجأة استسلمت

لنشاز لَعين بيعض في الاوتار

والدنيا فجأة اتحولت

لبواقي ليل 

لبواقي روح

لبواقي بور

ضرب الخضار

كل السواقي اتهدمت 

انتِ السبب 

وانتِ اللي حولتي القمر 

لمحاكم التفتيش

وانتِ اللي بعدك كل شيء رافض يعيش

فـ متلعنيش الحلم وتسيبي الكابوس

ومتسأليش عن ضي فجر الذكريات

الشمس غابت بين عينيَّ وفوق كتافي

وانا قلبي حافي من الأمان 

وعينيكي بس اللي انتحر فيها المكان

أما الزمان

فمالوش حدود إلا الوجع

ومفيش خشب يعمل مراكب من حنين

وقت الطوفان.

من ديوان البعد الرابع للأحلام 

#نقاش_دوت_نت