قصيدة : عليل
الشاعر سيد علي
ب أسيب الدنيا تحلملي
وامسك في طرف الليل الاخير واهرب
يمكن لاني عليل !!
مش قد حلم طويل
في نهايته اقوم مخضوض وكأني متكهرب
الرؤيه واضحه صحيح
وواقعها كان اغرب
مش قد اني المحك
اضعف من العصفور
بجناح ضعيف مكسور
مش قادره ع الطيران
والمح عنيكي السود المليانين احزان
بتصبي دمعك مر
في جوف مكلبش من لهيب دمعك
مش قد اكون سامعك
بتقولي قولة اه
الحلم لما اتقتل
انا كنت ضيف جواه
وكان مصيري الضعف
مربوطه ايدي بس خلف خلاف
مش قد اكون خواف
واقف في اخر صف
واستني يمكن
بكره الزمن هيلف
والقاني في الاول
بهرب في نص الحلم
بهرب ف بيطول
كان مستحيل نبتسم
ونزود المسافات
في الليله دي بالذات
كان القمر شاهد
علي روح بتتواعد تسيب
كان القمر بيغيب
ويسيب ظلام حالك
ايه اللي اوحالك
ان الفراق مرغوب
وان احنا سيبنا البكا
كفاره للمكتوب
سيبتك وانا المغلوب
ما املكش من امري
غير اني اشوف خطوتك
تبصم علي عمري
وتقوللي عيش وحدك
ابني هنا لحدك
في مكان فراقنا وموت
بصرخ بعلو الصوت
ضلل يا ورق التوت
علي روحنا واتبسم
ده الفرح متقسم
ومعادش لينا نصيب
كان مستحيل نبتسم
والدنيا حالفه تسيب
ف قلوبنا مليون اه
كان مستحيل الليل
هيودعك برضاه
ويسيبني اعيش مكسور
#نقاش_دوت_نت
موضوعات ذات صلة
التعليقات
أضف تعليقك