أخر بنات .. الحكاية

آخر كلام البنت لعيون الولد ...

   ........... كلمه

رد الولد ...

كنتى الأميره الأَميره

و انا كنت أجبن جبان

 *****

يا صُبح ... 

لو بلّ الطَّريق منَّكْ نَدَى

وِ حْياةْ عُيُون القاهره ...

  ... ما تْبِلّهَاش

ضيَّعْت فيك عمر ابتدا

و اشتقت لك عمرين ... بلاش

فانشقَّ شَقّ القلب شَقّ الغيم 

على قلبين جُمَالْ

كلّ القلوب اتجمَّعوا ...

بيزفّوا كل المحرومين

يا صُبح ... مِينْ

يعرف حبيبى ماحبّهوش ؟!

وحياة عينيك ...

يا صبح رد بآه ... يا لأ

حَبِّيتْ حبيبى ؟!!

لفحتنى نسمهْ بارده جدًّا ... 

   ... فانتبهت

و قعدت افكَّرْ ...

فين حبيبى وْ فين انا ؟؟!!

يا كل مِنْ يعرف مكانه ... يبلَّغُهْ

الليله دبت من القلق 

و من اختصار الكلمه فى الوقت المناسب 

و من الصداع 

و من ابتهاج القلب فرحان باللقا

و من الوداع

معقوله بَسّ ...!!

ازَّاى احبِّكْ ... و انتى أبعد م الخيال ؟!

حَتَّى الخيال 

بيكون ساعات أقرب كتير

و الحبّ أسهل للِّى زَيِّى 

لو بتتحدَّاه عِينِيكِى

أنَا كنت مِنِّكْ ...

زَىّ ضِلّ بنسحب قُدَّام عينيكى 

و انتى رافضه تْحِسِّى بِيهْ 

أنا كنت إيه 

غير طفل ماشى فْ سكَّه تايْهة 

رافضه تتعَكِّزْ عَلِيهْ ؟

تتصوَّرِى ...

 ... الطير بكى

لحظة ما حسّ بقربه مِنِّكْ

لحظِةْ ما كان لازم يضُمِّكْ

يا دقَّة القلب اللى حاولت 

تكسر القيد اللى كنا نشتهيه 

مش كنتى شوقه اللى فاضل له 

و اللى ابتدا يغرق فى ضله

كنتى حلم كبير عَلِيهْ 

  كنت حلْم كبير عَلِيهْ .

#نقاش_دوت_نت