الفنان محمد سامح: وهبت حياتي للفن وأتمنى أن أترك بصمة في مشواري الفني

الفنان محمد سامح  ممثل مصري يأسر قلوب متابعيه بأدواره المتعددة شارك في العديد من الأعمال الدرامية، بدأ مشواره الفني أواخر ثمانينيات القرن الماضي وفي عام 1993  شارك في مسلسل العائله.

وهب سامح حياته للفن واستقال من وظيفته ليتفرغ لفنه

ويناشد المخرجين والمنتجين بدعم الفنان المبتديء ومنحه الفرصة لتقديم ما لديه،  ويشيد بدور والدته في تشجيعه.  "نقاش " حاولت مقاربة التجربة الإنسانية قبل الفنية، ونستمع لحكاية شخص اختار طريق الفن وواصل السير فيه رغم التحديات.

هنا حوار معه : 

●كيف بدأت رحلتك مع التمثيل؟

 بداية رحلتي جات بالصدفه البحته عندما حضرت بروفه لمسرح الهواه بالاسكندريه وشفت قد ايه الناس دي بتتعب وان ليهم عالم لوحدهم ومؤمنين بيه جدا رغم ان الشغل بدون فلوس او شهره ومن خلال مره واحده قعدت في الكواليس وبصيت علي كراسي الصاله الفاضيه وتخيلتها عليها ناس

وقلت لنفسي مين ده اللي ممكن يقف علي الخشبه دي ويمتلك قدره إنه يجمع الناس دي باختلاف اعمارهم وثقافتهم علي ضحكه او دمعه او سوكسيه ..

اكيد اللي بيقف علي الخشبه دي شخص خارق ومن هنا بدأت رحلتي من اواخر التمانينات.

●مين أكتر شخص شجعك في المشوار؟

 أول شخص شجعني هي والدتي وقالتلي اعمل اللي بتحبه وانجح فيه وفضلها عليا لا ينسي.

●هل تتذكر أول وقوف أمام الكاميرا؟ كيف كان إحساسك؟

 كنت باعمل ضابط في مسلسل العائله سنه 1993 وجايبين لي بدله واسعه جدا وقعدوا يضيقوها عليا وانا لابسها وكان كل مشكلتي في الكاب اللي لابسه ومن جوايا باضحك وده كان كفيل انه يخليني اعدي اليوم ده من غير أي قلق وماحسيتش أصلا ان فيه كاميرا دايره....

.بس الحق يتقال ....مع كلمة اكشن الممثل الحقيقي بيعرف يدخل في ثانيه في الشخصيه وبيحس إنه بيقول رساله والنفس بيكون محسوب عليه. 

●كيف تتعامل مع الفرص التي تأتي إليك فنيًا ونفسيًا؟ 

الفرص اللي بتجيلي باتعامل معاها فنيا اني باحاول افهم من المخرج او المساعدين الشخصيه دي عباره عن ايه من خلال كلمه واحده طيب /شرير/خبيث/ اي صفه ...وابدا ابني عليها احداث من خيالي وباحس دايما اني عندي الاحسن والافضل ...

ومش باعقد نفسي خالص خالص وباخد الموضوع ببساطه واول ما اسمع اكشن باتعامل مع الشخصيه بكل بساطه كأني انا الشخصيه وبس كده وبتطلع بشكل الحمد لله بيرضي المخرج والا حيطلب مني أعيد لغايه ما يوصل للي هو عاوزه .

أما نفسيا دي مقسومه اتنين 

أول حاجة اني بامسك في الفرصه وباحاول اثبت نفسي فيها

وتاني حاجه إني لغايه دلوقتي محتاج الدور اللي امشي جوه شخصيته قوي والل يظهرني أكتر ويساعدني علي الانتشار والتنوع ويلفت نظر المخرجين والمنتجين ليا على الأقل اتحط في صفوف المشاهير.

●ما هو أهم درس تعلمته من هذه الرحلة؟

 أهم درس ...هو مش درس واحد دي دروس كتيرررر واتدفع فيها ثمن غالي قوي ولسه بادفع

وكله طبعا بتوفيق ربنا

ولكن نقدر نقول مثلا (( كل واحد عنده حلم مصدقه حييجي يوم ويحققه)) ...درس تاني اعتمد علي نفسك وربك فقط....درس تالت / اعرف شئ عن كل شئ واعرف كل شئ عن شئ.

●هل مرّ عليك وقت شعرت خلاله إن الاستمرار صعب؟ وكيف تغلبت على ذلك الشعور؟

 مر عليا اوقاااااات حسيت فيها ان الاستمرار مستحيل مش صعب.. بس أنا كان عندي إصرار إنه يكون صعب مش مستحيل ...وباحاول في الصعب زي اللي بينحت في الصخر بضوافره وده اللي خلاني أكمل وحافضل مكمل لغايه آخر يوم في عمري..

بس باحلم قبل ما أوصل لآخر يوم في عمري أكون عملت حاجه في الفن وقدرت أسيب بصمه تخلي اللي حواليا يتشرفوا بيا.

●كيف تواجه ضغوط الحياة بجانب عملك في الفن؟

ضغوط الحياه بجد تعبت جدا جدا لاني سيبت كل حاجه في الدنيا وبقي الفن هو هدفي وطريقي بعد ما كنت مستقر وعندي وظيفه كبيره عملت منها معاش مبكر وبقيت متفرغ (( للفن)) 24 ساعه وسيبت بيتي في الغردقه وبقيت قاعد في القاهره ((للفن)) ..

ووهبت اللي باقي لي من عمري (( للفن)) بس بجد محدش بيرحم حد والضغوط بتزيد كل يوم عن التاني ولسه ماوصلتش في الفن لمرحلة الرفاهيه ...ومحدش يعرف انا عايش ازاي أصلا ....مركز جدا اني اكون لابس شيك جدا وحاطط بارفان ومبتسم ومبسوط قدام الناس ...ومحدش يعرف جيبي فيه كام او عايش ازاي.

●ماذا تحب أن يعرف عنك الناس بعيدًا عن الشاشة؟

 بالنسبه للناس مش حتستفاد اي حاجه لما تعرف عني اي حاجه بعيده عن الفن ...في النهايه الفن هو حياتي بجد

ومش طالب من الناس غير حاجتين (( يسيبوني في حالي / ويدعولي من قلوبهم ))

●هل مازال لديك حلم فني تسعى لتحقيقه؟ 

أيوه طبعا عندي حلم فني باسعي له ... أنا لسه ما حققتش حاجه خالص وبابدأ في سن كبير بس شايل جوايا خبرات كتير فنيه لأني بامارس فن طول عمري...لسه محتاج اظهر موهبتي ...محتاج أثبت نفسي.

●ماذ تحب أن تقول للمخرجين والمنتجين؟

 أحب اقول إيه للمخرجين والمنتجين ونضيف عليهم الكاستنج دايركتور كلام كتير قوي قوي أتمني يكون له تأثير رغم إني عارف ان كلامي بالنسبه لهم (( لا شئ )) بس حاقوله وأجري علي الله يمكن يطلع منهم أشخاص قليلة نادره جدااااا جدااااا تستوعب كلامي أو تفكر فيه

ونبدأ بالمخرجين/ مش حتخسر حاجه ابدا حضرتك لو اكتشفت وجوه جديده او عملت إعاده اكتشاف لممثلين موجودين علي الساحه بلاش تستسهل وتجيب قوالب ...ده شكله دكتور يفضل طول عمره يعمل دور دكتور / ده شكله بلطجي يعمل كل ادوار البلطجه...والله هو ممكن يكون جواه ممثل عبقري وانت قادر انك تطلع العبقري ده من جواه هو حيستفاد إنه حينوع في أدواره وأنت حتستفاد انك حتطرح وجه جديد ودم جديد علي الساحه ...نقطه تانيه فيه الاف من الناس جواها موهبه ومش لاقيه فرص ...

كل المخرجين مش حيخسروا حاجه خالص لو ابتدوا يبصوا للناس دي كويس ...ده طبعا غير الممقلين القدامي اللي قاعدين في بيوتهم ومش بيشتغلوا رغم انهم معروفين وعندهم موهبه.

أما بالنسبه للمنتجين/ حضرتك مفيش أي داعي تعصر الممثل الصغير علشان توفر كام الف جنيه انت اصلا بتصرفهم في عشوة وبنزين عربيتك بس مع الممثل الصغير او اللي مش لاقي ياكل حيفرقوا معاه قوي قوي قوي....وبلاش تمسكه من ايده اللي بتوجعه وتقول له لو مقبلتش الاجر ده حاجيب ممثل غيرك / نقطه تانيه مغايره خالص لكل اللي قلته برضه وهي ان حضرتك كمنتج بتبيع بأسم النجم والبطل والصف الاول والتاني بتاعك مش حتفرق بقي معاك مين الصف التالت ده مش حتبيع بيه حضرتك ممكن تدي فرصه لواحد موهوب يكون صف تالت ( والله حيدعيلك وحتكسب فيه ثواب وحتشوف ربنا حيعمل معاك ايه علشان راضيته).

مش لازم الصغير يفضل صغير لغايه مايموت ..اعرف ممثلين موهوبين عاشوا وماتوا وهما بياخدوا مشهدين وتلاته بالكتير قوي ...حضرتك كمنتج لو خليته صف تالت حتستفاد ماديا لأن الصف التالت اللي موجود في السوق لو بياخد جنيه لما تجيب الممثل الصغير وتخليه صف تالت ممكن ياخد نص جنيه وحيبقي فرحان جدا إنه أخد فرصه يعني سعادتك استفدت إنك دفعت نص الاجر ووفرت وفي نفس الوقت اديتله فرصه ممكن يدعيلك بسببها كتير ومهما وصل حيفضل شايل لك الفضل.

أما بالنسبه للكاستنج دايركتور أولا المهنة دي مفهومة غلط هنا في مصر ومع ذلك هما بكل أسف فاكرين إنهم بيوزعوا الأرزاق وأتمنى ميبقاش تعاملهم بالشكل ده.

بالمناسبه كل اللي حكيته أنا عشته بالفعل مش باتجني علي حد وعشت كمان أسوء منه بكتير جدا.

●ما هي رسالتك لكل شخص يحاول التمسك بحلمه رغم الظروف؟

(( اوعي تيأس)) ربنا شايفك بتسعي قد إيه وحييجي الوقت اللي يجبر بخاطرك فيه ( بس استمر وخلي نفسك طويل ) 

ربنا من فوق السبع سماوات شايف سعيك وألمك وشقاءك ومش حيسيبك بشرط تكون مؤمن بنفسك وبموهبتك.

#نقاش_دوت_نت