علاقة بالسالب.....

فيه علاقات كتير في حياتنا محسوبة علينا علي الفاضي ..

علاقة كل ما بندخلها بنحس أننا بنطلع منها بأقل من كل حاجه .. أقل طاقه أو أقل سلام نفسي

علاقة خصم مستمر من طاقتنا و روحنا .. تقريبا بتبقى الطرف الخسران

مش لازم نوع العلاقات دي فيها شد و جذب و خناقات و صوت عالي لا خالص 

علاقات بتبقى هادية بتاكل منك واحدة واحدة .. تسرق فرحك بهدوء و تطفيك و تطفي الحماس جواك

علاقه بتحس فيها انك تعبان من كتر انك شايف حاجات غلط كتير و ساكت 

مستني فرصه يا تخلص منها يا تهرب منها بكل شياكه من غير خساير

و عشان دايما بتبقي حاسس انك مقصر رغم انك عامل اللي عليك و زياده ف بتقع في فخ التبرير

اللي بيخلص علي باقي طاقتك..

أهم علامات العلاقات اللي بالسالب انك طبعا مش مرتاح .. مش عارف من ايه بالظبط بس دايما

متوتر و قلقان .. تاني علامه انك متغير و للأسوأ .. بقيت نسخه من نفسك انت مش عارفها 

بتتعرف عليها من جديد .. تالت علامة الوحده .. بتحس انك وحيد رغم انك معاك حد سواء

أهل أو شريك حياة .. او عندك اولاد كتير بس حاسس ان كل دول بيسنزفوك حرفيا ..

و اخطر علامه انك تصدق ان العلاقات دي طبيعية و كل الناس كده .. وتبدأ تصدق انك لازم تضحي

و تتوجع و تبذل أكتر من كده...

المشكله هنا اننا بنكمل في العلاقات دي ... السؤال هنا ليه بنكمل في العلاقات دي؟؟

طبعا سبب من الاسباب ..شكلنا الاجتماعي قدام الناس .. أو الخوف من الوحده و اننا نبعد منعرفش

نبقى علي تواصل معاهم تاني ...

وساعات بنخاف نبتدي من جديد و ده فعلا موضوع مش سهل علي ناس كتير في مختلف الأعمار 

و الخوف الاكبر من كل دول اننا نواجه نفسنا بأننا اختارنا غلط او معلمناش ولادنا قيمه و معني حقيقي

عشان يفضلوا حوالينا أو غلطنا في اختيار شريك حياه مناسب.

و ساعات ناس بتكمل عشان الذكريات بس مش علشان الحاضر ... عشان شكل العلاقه مش حقيقتها ..

صديقي المستنفز من علاقه بالسالب .. اعرف دايما ان فيه باب للخروج ..و ان العلاقه الصحيه عكس كل اللي قولناه .. العلاقه الصح بتحس انك مفيد و أقوى و أهدى مبسوط و مرتاح ... و الناس و المكان مساحة آمان كبيره ليك ..

طبعا بيبقى فيها مشاكل لكن المشاكل مبتهدش فيك و لا بتهينك و لا بتقلل من وجودك .. العلاقه الصح بتضيف لحياتك و بتحب النسخه دي منك و انت جمبهم ...

أول لما تحس ان وجودك مش فارق او اي حاجه بتعملها مش متشافه أقفل حنفيه العطاء و اعرف ان باب

الخروج مستنيك .. لأن ساعتها الخروج مش فشل ده بيبقى نجاه ..

مش انانية منك انك تختار نفسك بالعكس العلاقات اللي بتاخد مبتديش علاقات خطيره .. مش عشان تبان 

انك كويس و مش شخص اناني تدمر نفسك .. فيه ناس بتهتم فعلا بشكلها .

الأنانية الحقيقيه انك تفضل مكمل و تسيب نفسك تضيع .. اختيارك لنفسك مش قسوه ده احترام و وعي..

أهم درس لازم تعرفه ان اي علاقة متضيفش ليك هتبقي بتخصم منك و ساعتها لازم تقف .. و تواجه نفسك

و تسأل نفسك هو انا مستعد أدفع عمري تمن علاقات مش راجعه عليا غير بخساير ؟؟

الحياة أقصر من اننا نعيشها بالناقص .. بالسالب 

أقصر من اننا نفضل نصلح في علاقات مكسوره بايظه من الاساس .. أغلى من اننا نديها لناس مش شايفانا.

#نقاش_دوت_نت