نعيم الجهل ....

" اللي يعرف أكتر ... يتوجع أكتر"

مقولة معروفة مفيش كلام .. أو جملة بتتقال في لحظات الوجع و كأنها جملة بتأكد ان المعرفة حمل تقيل .. و بتأكد ان اللي مش شايف الحقيقه عايش مرتاح .. مش شايل هم ..

الهم اللي بيكبر عمرين فوق عمرك .. و بيكأبك و يعيشك في جحيم..

و يلعب في حياتك دور الندم أكبر دور .. تبدأ بعد المعرفه تدور علي الندم و تتمنى انك مكنتش تعرف الحقيقة ... و تفضل غافل .. جاهل 

هل فعلا الجهل نعمه ؟ و لا راحه مؤقتة قبل ما الحقيقة تخبط علي باب دماغك ؟

مفيش شك ان المعرفة نعمه كبيره و انك تكون انسان واعي و فاهم حاجات كتير في الدنيا

بيوصلك انك تكون في مكانه و مرتبه أعلى حبتين ..

فيه أوقات كتير بنتمنى عدم المعرفة .. أو اننا نغفل حقيقة اللي حوالينا

مانعرفش ان حد بيكدب

او منعرفش ان مشاعرنا مش متبادلة

او منعرفش ان فيه حاجه اتقالت من ورا ضهرنا 

لان المعرفه بتوجع و بتكسر صورة رسمناها في خيالنا احنا بس .. بتوقعنا في وهم احنا بس اللي عايشين فيه ..

في المعرفه انت بتشوف الحقيقه من غير فلتر .. و عشان كده ناس كتير بتختار تعيش في

" نعيم الجهل" .. تغمض عينيها بأرداتها ...تهدي كل اشاره واضحه للحقيقه و كأنها مش شايفاها . عايشه تصدق اللي يريحها حتي لو مش منطقي .

الجهل بقي زي المورفين بيدي احساس بالامان و السلام .. طول ما انت مش عارف انت مش في مشكله .

طول ما الحقيقه مستخبيه يبقي انت مش مجبر تواجهها ..طول ما الصوره كامله تبقي الحياه سهله و مثاليه . لكن السؤال الحقيقي هنا : الراحه دي بتفضل قد ايه ؟

الراحه بتروح لما يكون عند وعي .. الوعي مش دايما سهل بس أنضف ..

لما بتعرف بتختار الوعي و لما بتعرف بتختار حدود نفسك.. بتوفر علي نفسك وقت كبير من التوهان .. لأن الجهل بيخلينا نكمل في علاقات غلط أو نكمل في شغل مش مناسب.

نعيش دور مش بتاعنا ..

اول ما بنعرف الدنيا بتختلف و اختياراتنا بتتحدد و مبيبقاش عندك غير طريق واحد .. انك تواجه و تختار سكتك .. مبترجعش تغمى عينك تاني ..

فيه ناس كتير بتختار راحة البال المؤقته .. تقول : مش مهم اعرف .. او سيبها علي الله

" اللي يحصل يحصل " في الحقيقي الحياه مش بتمشي كده.. الحياة بتكافيء الواعي حتي لو تعب في الأول . الواعي بينقذ عمره من الضياع و الجاهل بيرتاح لحظات و يشقى قدام ..

أصعب لحظه مش انك تعرف .. لكن اصعب لحظه انك تكتشف انك كنت عارف حقايق و ساكت ..

الوعي و المعرفه مش لعنه .. نور بيكشف العيوب و الشروخ اللي في حياتنا .

و انت قدامك الاختيارين : يا اما تعيش في الضلمه مرتاح و مطمن يا اما تفتح الشباك و تواجه النور.

يمكن الجهل نعيم ... مؤقت هش و مريح و الحقيقه قويه و صلبه و لكن صادقه ..

فيه ناس تعبت من الوهم و لما عرفت الحقيقه فاقت و ارتاحت .

الحقيقه عمرها ما كانت عدو ..العدو الحقيقي هو التأجيل .. تأجيل المواجهه و تأجيل القرار

و ساعتها هتع ف انك كنت مش عايش في نعيم .. كنت عايش في تأجيل.

#نقاش_دوت_نت