الفرق بين بقرة وبقرة !!

في بوست قديم كتب صديقي المبدع المهندس خالد خليل عن تجربه صديقه في فنلندا حين دخل لأحد السوبر ماركت ليشتري علبه حليب ، ولاحظ ان في عبوتين بنفس الحجم ولنفس الشركة بلونين مختلفين بس لقى إن سعر واحده ضعف سعر الثانية تقريبا.  

استغرب .. فسأل عامله السوبرماركت ، قال لها : ليه سعرها أغلى من الثانية بكتير كده .. هي دي ( اورجانيك ودى مش اورجانك) ؟ بصتله باستغراب .. وقالت مافيش حاجه في فلندا أصلا مش ( اورجانك ).

قالها امال دى سعرها اغلى من دى بكتير ليه وهى نفس الشركه ؟ .

قالت له : اصل البقرة اللي جه منها اللبن الغالي ده بقره سعيدة . 

ضحك وقالها بقره سعيدة إزاي لمؤاخذه ؟

 قالت : البقرة اللي جابت اللبن الأرخص بقره فى مزرعة ، أما البقرة اللي جابت اللبن الغالي .. بقره في مراعى طبيعية مش محبوسه وبتجري وتلعب وبتجوز براحتها . 

واستطرد ، طبعا أنتم شايفين ان كلامها مبالغ فيه .. بس انا شايف انه واقعى جدا .. إحساس الكائن سواء حيوان او بشر بالحرية هي اللي بتديه سعادة بتخليه قادر على انتاج كل ما هو جميل وصحى وكثيف . بالنسبة للبشر الحرية بتخليه ينتج حضارة وتحضر . 

اذا كنتم عاوزين تزودوا الإنتاج .. متبنوش مصانع ولا تعملوا طرق بس .. حسنوا الخدمات للمواطنين .. وأعطوه حريه .. خلوا المواطن يعيش سعيد . يعيش حر .. المواطن السعيد الحر هيديكم انتاج . اما المواطن المكبوت التعيس يفضل يرغى في قضيه تافه زي ان مجدى يعقوب يدخل النار ولا هيروح مارينا .

فلو عاوزين حليب ابيض زي الفل . عيشونا في المزرعة السعيدة والنبي .

يقول مهاتما غاندي:

 الحرية هي روح الإنسان وأنفاسه، فكم ثمن هذه الأشياء؟

#نقاش_دوت_نت