فرد الوش من فقه الأولويات!!

الحياة موحشة في الخارج وأكثر خوفا في الداخل، حاول أن تعيش بفقه الأولويات، اختر الأهم فالأهم، ورحل ما يمكن أن تؤجله إلى الوقت والزمن المناسب.

أنت بتقول آيه يا عم ، اعمل أيه في الهموم اللي شيالها فوق دماغي ، المتطلبات التي تطاردك في كل لحظة وكل ساعة ، أنت بتخاف ترد على رقم متعرفوش لأنك مش عارف شكل القادم ، أو ما يمكن أن يكون المطلوب منك !!

وأنا في البنزينه طبعا قبل ما يغلى ليلة أمس ، اعطتني عاملة شكولاتة، كانت توزعها على السيارات، فسألتها هي دي بمناسبة آيه، مدير المحطة اتجوز ولا ابنه اطاهر ولا ايه المناسبة، لم نعد نعتاد إلا القبح، أو على أقل تقدير الاستغلال بأي شكل أو نوع، امسح الازاز يا أستاذ، ممكن، وتبحث عن فكه وتقدمهم وانت بتقدم رجل وتأخر أخرى، لأنه مش من قيمته، بس هو مش عارف أن جمعت كل ما في البيت عشان أملى شويه بنزين تضبط حمارتك العارجه اللي ممكن تعينك على ذل السؤال.

المهم: قالت لي بمناسبة شهر رمضان وكده ، سألتها وهي الشوكولاتة دي هديه كده ، ولا في حاجه بعدها ، ردت لا خالص هدية ، حضرتك مش عايز فواحه للعربية ، هززت رأسي شكرا ، طيب في منظف للبنزين ، جيركن عليه عرض ، قلت لها : هو بعد ما ارتفع سعره لسه عايز ينضف . سلام !!

قال لي صديقي : على فكره في ارتفاع بالأسعار بعد ارتفاع البنزين، قلت له : تفرق في حاجه ، ضحك وقال : ياعم انت مش مستوعب .

 قال : طيب انت عارف أن الدينار الكويتي رغم حرب ايران وامريكا وضرب الكويت ، عدى خطوط العرض والارتفاع ، قلت مبتسما : طيب هو ده يؤثر علينا في حاجه ، أنا لا معايا دينار ولا بقبض بالدينار ، ولا حتى عارف شكله ، وعلى رأي المثل اللي ينكسف من الدينار ـ حاجه كده زي بنت عمه ـ ميعرفش يشتري خضار !!

العصافير أعلنت في الخارج الصوصه ، هي فرحانه بالصبح ، ولا بتصحي بعضها ، ولا بتسبح في ملكوت الله ، ولا بتقول آيه بالضبط ؟!

التعليمات قبل ما أنزل من البيت : 

اطفوا الأنوار قبل الخروج ، حد يأخذ معاه كيس الزبالة مش هقدر انزل بيه وأنا لابس ومتشيك ، تأكدوا أن الحنفيات مقفولة ، نفس السيدة تجلس على أول الشارع كل يوم ، تطلب المساعدة ، ينظر لها الناس في فتور ويمروا ، واحد خرج من كل الأعراف وواقف في نهار رمضان على جنب بيشرب سيجارة جنب وبيتكلم في التليفون ، الله نزلوا إعلانات كحك العيد أسأل ولا بلاش !!

إذاعة ضمن باقة الإذاعة في السيارة ، اتبرع لعمل خط مياه، هو لسه في أماكن لم يصل لها خط مياه ، طيب هم ميعرفوش أن أثيوبيا دخلت في المرحلة الأخيرة لملء السد .

رد صوت داخلي ، الله يسد نفسك يا بعيد ، افرد وشك ع الصبح ، بحاول .. خد بالك أن فرد الوش من فقه الأولويات!!

#نقاش_دوت_نت