جحا و المجرة ....

بقلم : رانيا رؤوف

زمان في القصص و الحكايات القديمه كانوا دايما بيحكولنا عن قصص جحا و كأنه

مجرد شخص مضحك و بسيط .. لازم قصصه تبقى نهايتها عبره أو هدف ... جحا زي ما 

احنا عارفين راجل بسيط ، تصرفاته غريبه و كلامه ساعات بيبان ساذج أو بعيد عن المنطق

و الناس بتضحك عليه و الحكايات للتسليه و كأن وظيفته انه يسلى الناس ..

لكن لو بصينا للقصص دي من زاوية تانيه هنلاقي ان جحا مكانش أهبل زي ما الناس بتتخيله

بالعكس تماما .. جحا كان مختلف .. و هنا في مجتمعنا المختلف بيتعب شوية مع أدمغة الناس.

يحكى أن جحا كان قاعد قدام باب بيته في ليلة من الليالي بيتأمل النجوم و السما و سرح جدا

في خلقة ربنا و صنعه ..فضل يتأمل النجوم و يتتبع خط سيرها و أشكالها ..فضل باصص

للسما فتره طويله .. جه حد ماشي من البلد و شافه سرحان في ملكوت ربنا و المجره اللي

قدامه .. 

سأله: مالك يا جحا باصص كده ليه للسما ؟ 

جاوبه جحا بكل بساط : ببص للمجره 

ضحك الراجل و قاله : وانت يعني لما تبص للمجره هتفهم حاجه ؟

ابتسم جحا و قاله : مش لازم أفهم حاجه كفايه افهم ان الدنيا أوسع بكتير من اللي احنا شايفينه

الموقف بسيط في عيون كل اللي قرا قصة جحا .. بس بيقول حاجه مهمه . احيانا المشكله

مش بتكون في الشخص اللي بيفكر بطريقة مختلفه ، لكن المشكله في اللي متعودين يفكروا

 بنفس الطريقه طول الوقت.. الناس بطبعها مبتحبش تشوف حد مختلف عشان مش بتقدر

تستوعب الاختلاف نفسه ، بتحب اللي يمشي مع القطيع يقول نفس الكلام و يفكر نفس

الفكر .. و أي حد بيحاول يشوف الدنيا من زاويه تانيه الناس بتقابل رؤيته بالسخرية و ساعات

تقليل من قيمة تفكيره .. المهم انه يرجع ان أفكاره الغريبه دي و ينضم لصفهم من أول و جديد.

في الحقيقه كل الأفكار الكبيره بدأ بأفكار غريبه و جديده محدش في الأول كان مستوعب 

الافكار دي . وأي حلم كان مستحيل أو فكره كانت ممكن تغير العالم كان وراها حد بيفكر

بشكل مختلف و ليه رؤية و تفكير عير كل اللي حواليه .. الغريب ان ساعات الناس بتخاف

تبقى الشخص ده .. الشخص المختلف اللي بيفكر بره الصندوق .. يخاف من الاختلاف لانه

ممكن يقوده للوحده .. ف يا اما يكمل في حلمه في تغيير المجره أو ينضم لصفوف الجماهير

اللي ماشيه ورا بعض ..

الصراحه العالم عمره ما أتغير بناس تقليديه أو كانت ماشيه ورا بعضها بتورث بعضها نفس

العادات و الأفكار ، لكن كل الناس اللي أثروا في العالم كانوا مسندوين علي أفكارهم و 

نظرياتهم مهما كانت غريبه للمجتمع حواليهم ..

عشان كده حكايات جحا فضلت عايشه لدلوقتي و كان اختلافه سر نجاح حواديته عشان

كانت بتفكرنا بحاجات مهمه ..

الانسان مش لازن يكون نسخه من اللي حواليه و مش لازم يفكر بنفس الطريقه و لا يشوف

الدنيا بنفس وجهات النظر .. يمكن جحا كان واقف لوحده و هو باصص للمجره لكن اللي فهمه

في اللحظه دي ان الكون أوسع بكتير من ان الناس كلها تفكر بنفس الطريقه ..

و في اي عالم واسع دايما فيه شخص واحد عنده فكره مختلفه و اصرار يتمسك بيها

ممكن جدا يقاوم عالم بحاله ..و أحيانا يغير غيره..

#نقاش_دوت_نت