على المحك

 بتمر في حياتنا لحظات بنحس فيها إن كل شيء علي الحافه ، أو علي المحك .. 

كأن الدنيا واقفه علي أطراف الحافه ، وكل خطوة ممكن تغير كل حاجه .. أوقات 

الموضوع ممكن يكون علاقه أو حلم بنتمناه أو علاقه بنتخيل نفسنا جواها .

اللحظه اللي كل شيء فيها علي المحك ساعات بتبقى صعبه و القرار فيها بيبقى 

صعب ، لكنها لحظه بتكشف فيها عن قدراتنا الحقيقيه ، قدرتنا علي التحمل و 

التفكير أو حتى التعامل تحت ضغط ..و مواجهة نفسنا قبل اي حد تاني.

أي لحظه بتمر علينا بنواجهه فيها نفسنا هي لحظه علي المحك .. لو حتي

 واجهنا فشلنا أو حد علاقتنا بيه كانت محتاجه وقفه مع النفس ، و نبعد عشان

نشوف الصوره بشكل أوضح .. كل موقف اتحطينا فيه عشان نعرف حقيقة

أو نتعلم حاجه جديده هي لحظه علي المحك .

اللحظه اللي فيها بتكتشف حدودك و تتعلم قوة صبرك ، و تعرف قيمة ذاتك 

لما تواجه صعوبة حقيقيه أو مصير أو قرار سفر بينقل حياتك لمرحلة جديده

أوقات كتير بنأجل اي قرار صعب أو نهرب من حقايق معينه .. الحقيقه الهروب

مش بيغير اي حاجه ، اللي بيغير الحاجات هو انك تواجهها حتي لو بخوفك.

حتى لو مش واثق ، حتى لو كل شيء بيتهز حواليك .

اللي بيعدي اللحظات دي بنجاح مش بس بيحقق هدف كبير ، دي بيكتشف نسخه

جديده من نفسه ، جزء كان مخفى ، قوي و شجاع و يقدر يواجهه أصعب المواقف.

و علي الجانب الأخر فيه نوع تاني من البشر بيسيبوا كل حاجه علي الحافه

علي أخر وقت .. حتي في علاقاتهم مش بيعالجوا اي مشكله بس بيسيبوا

العلاقات دي تلفظ أنفاسها الأخيره ..أو ينقذوا نفسهم أو يحاولوا يعالجوا

مشاكلهم في اللحظه الاخيره .. الغريب ان كل مره الموضوع يكاد يكون خلاص

بينتهي أو بيفشل .. و علي اخر نفس بيلحقوا نفسهم .. بيروحوا مواعيدهم في

اخر دقيقه .. و بيلحقوا كل حاجه في اخر ثواني .. عالمهم مليان سرعه و تسارع

و مغامرات .. و في كل مره ربنا بينقذهم من كل الصراعات اللي بيحطوا نفسهم

فيها ..

النوعين علي المحك ، نوع بيجاهد عشان يكتشف في لحظات المواجهه نفسه 

والنوع التاني ممكن يخسر حياته و مستقبله لآنه حاطط كل حياته علي اخر نفس

و اخر دقيقه .. مش مهتم بخسارته أو ممكن يكون بيهرب من مواجهاته ..

ميعرفوش ان اللحظات دي فرصه عشان تبني نفسك و تثبت لنفسك ان حتى

لو الدنيا ضاقت .. انت قادر لسه تواجهه و تكمل و تنجح

#نقاش_دوت_نت