لو نفسك تكون عم فرج قول ومتخفش!!

أنك تعيش مش مهم ، شيء مريح جدا ، يعني زيك زي معظم الناس ، تتصرف زيهم ، متخدش الحياة على صدرك ، تقعد على القهوة تلعب طاولة أو دومينو ، وتشرب شاي خمسينه وتقوم تروح وتجيب جبنه وعيش فينو وكيس فول وشويه طعمية ، وتتعشى وجبرت.

الناس اللي بتعيش في صراع مع الحياة ، متعبة ، منهكة ، ليلها نهار ونهارها ليل ، الناس اللي رميه نفسها على الحياة بحثا عن مكان أو مصلحة أو تدخل في دائرة البحث عن حق الانتفاع سواء كان مكتسبا أو غير مكتسب ، ناس بائسة وحياتها مظلمة .

عم فرج مثلا : عامل القمامة بجمع القمامة بالنهار ، ويروح على بيته ، غداه جاهز ، أيًا كان شكل وملامح ومضمون الغدا ويأخذ القيلولة ويقوم يكمل شغله الخاص بعيدا عن العمل الحكومي ، أيضا في جمع القمامة ، من شقة أو محل أو عماره وبعد ما يخلص يطلع من جيبه كيس المعسل ويقعد على القهوة يضرب الحجر وشويه شاي خمسينه ويروح ينام .

عم فرج ، زوج بناته والحمد لله ، لا عنده قرض مأرق عليه حياته يدفعه ازاي ولا عنده قسط هيلمه منين ولا مشغول بالبورصة وارتفاع الدولار وانخفاض الجنية ولا عنده طموح يبقى محافظ ولا عضو مهم في حزب ، يمكن أخر حاجه يشوفها قبل ما ينام مسلسل قديم أو حتى جديد ويبص لمراته ويقولها فاكره أيام زمان ، قبل ما أكون رئيس عمال كنا تعبانين جدا ، الحمد لله أحنا اليوم في نعم .#نقاش_دوت_نت 

عم فرج لم يغير موبايله أبو زراير ولا عنده فيس بوك ، ولا بيشارك في الحوار الوطني ، ولا حتى بيروح انتخابات ، ولا عمره بحث عن كتاب كيف تكون سعيدا ؟ أو رحلة المليون ؟ ولا مهتم مين جيه ومين راح ، ولا حتى سافر غير بلده ، عشان يطمن على عيلته كل فين وفين ، ولا عارف يعني أيه شرم الشيخ ، ولا فين الغردقة على الخربطة ولا شكل العين السخنة ، ولا حتى شاغل نفسه لما يموت هيدفن فين ، مقابر صدقة ولا المقابر اللي جنبها ، أصحابها اشتروها وحطوا عليها يافطة كبيرة وكل سنة يدهنوها ويظبطوها عشان يموتوا موته مختلقة !!

نسيت أقولكم .. أن كل يوم الصبح عم فرج يقوم من النوم وشه بيضحك ، مش مكتئب ولا خايف ولا عنده كوابيس ، ويقول كل الناس وهو ماشي صباحكم رزق !! 

# نقاش-دوت -نت