لا طبعا أيه المدير " العيل " اللي همشي واره ده !!

كانت المديرة لا يتجاوز عمرها من 26 إلى 28 سنة ودارسه الإدارة في لندن ، في أول زيارة لها لإدارة الإعلام وكنت وقتها مسئولا عن الصحفيين في الإدارة ، قالت في أول اجتماع ما لفت انتباهي هي زيادة وزن الموظفين والموظفات ، ليه كده ؟!

طبعا لما وصلنا ـ المكان ـ كانت كل الأمور سهلة جدا الحقيقة ، كل شيء متوفر ، الشغل لساعات طويله ، مفيش حركه ، البلد نفسها والجو لم يكن يساعد على عمل أي شيء ، تشتغل وتأكل وتنام وبس.

ـ قلت وقتها ، وعلى فكرة هي من المرات القليلة التي كنت اعتبر فيها أنني وصلت لوزن تاريخي يقدر بالعشرات من الكيلو جرامات ـ قائم طبعا ـ !!

ـ طيب حضرتك نعمل ايه يعني ، ردت لازم الوزن ده ينزل ، انتوا كده تموتوا هشتتغلوا ازاي ؟!

ـ قلت لها : مفيش وقت ، والناس دي تنزل وزنها إزاي ، عشان تعملي ده لازم يكون عندهم حافز ، لأنهم مستقرين جدا في الكيلو جرامات دي وعاملين تناسب وحيز جيد في الفراغ ...

ـ قالت : نعمل مسابقة اسبوعيه للموظفين والموظفات ، اللي ينزل وزنه على نهاية الأسبوع 5 كيلو يأخذ جائزة 500 ريال ، ونجيب الميزان كل يوم خميس وكل واحد يسجل وزنه.

ـ الحقيقة الفكرة كانت ممتعه ومفيدة ، وبلغنا كل الزملاء ، وقلت لهم تبقى فضيحة وانت طالع على الميزان اخر الأسبوع قصاد الناس كلها ونزلت جرام ، أو زاد وزنك وتكون مجال للسخرية .......شدوا نفسكم يا شباب مش عايزين فضايح ..

ـ المهم : في الأسبوع الأول نجحت أنا شخصيا في خسارة 5 كيلو جرام وكنت الأول على الكل بعد نظام رياضي قوي وغذائي طبعا ، وحصلت على المكافأة .

ـ في الأسبوع الثاني والثالث ، نجحت أيضا في الحصول على المكافأة ، فقررت هي ـ المديرة ـ وقف المسابقة وقالت هو مفيش حد مهتم غيرك ..

الحقيقة :

ـ علمتني درسا في الإدارة من ناحيه ، وساعدتني في أنزل من وزني اكثر من 15 كيلو جرام حتى أن اولادي في أول إجازة خرجت قصادهم من المطار ومعرفونيش بعد ان قل وزني تماما .

ـ فرق جدا ده معايا في الشغل وأعطى انطباع جيد ، أن المسئول عن العمل يجب أن يطبق على نفسه قبل الآخرين ويكون نموذجا لهم.

ـ علمتني أن اشتغل على نفسي في أي حاجه وانا عندي إرادة أني هقدر إن شاء الله .

ـ المدير حتى لو كان يصغرك كثيرا في السن استفيد من خبراته ودراسته وفكره ، مش تقول ده عيل ايه ، همشي ورا عيل !!

#نقاش_دوت_نت