ولاد الأصول

في وقت بقى كل شيء فيه سريع و كل حاجة قابلة للتغيير حسب المصلحة … بقت كلمة “إبن أصول” تتقال بسهولة ، لدرجة إنها فقدت جزء كبير من معناها .

زمان كانت الكلمة دي وسام … ما يتقالش لأي حد ولا يتاخد بالشكل أو بالكلام ، لكن بالمواقف … بالتصرفات … بالطريقة اللي الإنسان بيظهر بيها وقت الشدة .

“ولاد الأصول” مش الناس اللي بتعرف تتكلم كويس و لا اللي بتلبس كويس و لا حتى اللي معاها فلوس أو إسم عيلة .

ولاد الأصول الحقيقيين … بيبانوا لما الدنيا تضيق ، لما الخلاف يكبر و لما يبقى قدامهم فرصة يردوا الأذى بأذى … ويختاروا إنهم ما يعملوش كده .

الأصل مش إنك ما تغلطش … لكن إنك لما تغلط تعترف و تصلح و ما تكابرش .

الأصل إنك تحفظ العشرة حتى لو انتهت العلاقة .

وإنك ما تستخدمش أسرار الناس كسلاح في وقت الغضب .

في زمن بقى فيه “الرد القاسي” شطارة ، و”الفضيحة” بقت إنتصار ، و” الإنتقام” بقى حق مشروع في نظر ناس كتير … يظهر الفرق الحقيقي بين اللي متربي على أصل واللي حافظ كلمتين وبيكررهم .

ولاد الأصول … مش ملايكة و لا ناس كاملة ، لكن عندهم خط أحمر ما يعدوش عليه مهما حصل :

إنهم ما يؤذوش حد بقصد ، و ما يكسروش خاطر حد كانوا يوم من الأيام سبب في فرحته .

الأصيل ممكن يسكت … مش ضعف ، ممكن يعدي … مش عجز ، ممكن يبعد … مش هروب ، لكنه في كل مرة بيختار نفسه بدون ما يدوس على غيره .

وفي العلاقات … الأصل بيبان أكتر من أي وقت تاني .

في الخلافات تحديداً … لما تلاقي حد حافظ كرامتك وهو زعلان منك ، ما قللش منك قدام حد ، و ما حاولش يشوه صورتك علشان يبرر موقفه … إعرف إنك قدام شخص “إبن أصول” بجد .

أما اللي أول ما يزعل ينسى كل حاجة حلوة كانت بينكم ويبدأ يطلع أسوأ ما عنده … فده عمره ما كان أصيل ، حتى لو حاول يقنعك بعكس كده .

ولاد الأصول … مش بيتقاسوا بعدد الناس اللي حواليهم و لا بكمية الكلام الحلو اللي بيتقال عنهم ، لكن بالمواقف اللي ما إتقالتش … والتصرفات اللي حصلت في صمت .

ممكن تلاقي “إبن أصول” بسيط جداً ، مش معروف ، ولا صوته عالي ، لكن وجوده في حياة أي حد أمان .

وممكن تلاقي حد ناجح ، لامع والكل بيشكره … لكن وقت الجد ، ما تلاقيش له أصل ولا سند .

الأصل تربية … لكن كمان قرار .

قرار إنك تفضل محافظ على نفسك ، حتى لما الدنيا تضغط عليك ، وحتى لما تتعرض للخذلان .

إنك تفضل نضيف من جواك ، مش بترد الأذى بأذى ، ولا بتاخد حقك بطريقة تكسر غيرك .

وفي الآخر … “ولاد الأصول” مش لقب بيتقال ، ولا صفة نديها لأي حد على مزاجنا …

دي حقيقة بتظهر … في وقت قليل الكلام ، وكثير الاختبار .

ويمكن أهم حاجة تفرقهم … إنهم مش بيحاولوا يثبتوا إنهم “ولاد أصول”… هم بس … كده فعلاً

#نقاش_دوت_نت