متخليش نفس الكلب يعضك مرتين !!

أثناء الإنشغال بالمتابعة على السوشيل ميديا وجدت فكرة بسيطة جدا ، كتبها أحد الأشخاص على صفحته ، والحقيقة رغم بساطتها ، إلا أنها حقيقة وتكشف الكثير من طريقة تفكيرنا وتعاطينا مع الكثير من الأشخاص والناس ... تعالوا نقرأ بيقول آيه :

فيه جملة عظيمة لـ Chuck Berry بتقول : Don’t let the same dog bite you twice ( متخليش نفس الكلب يعضك مرتين) .

فالحقيقة أن طبيعة البشر معقدة لدرجة انها ساعات مش مجرد انها بتسمح لنفس الكلب انه يعضها ، لا ده ساعات بتروح برجلها و تدور علي الكلب ده فين و تترجاه انه يكمل عض فيها ...

الدكتورة النفسية Ellen Hendriksen بتقول ان السلوك الغريب ده فيه عوامل كتير وراه ، بس من أغرب التفسيرات ان ساعات الانسان بيرجع للشخص اللي أذاه عشان عاوز يثبت لنفسه انه متأذاش !!

الموضوع بيبدأ لما الانسان يتأذي و اللي بيكون قدامه حل من اتنين ، يا إما يعترف انه في وضع مش كويس و يحاول يقاوم الاذي ، أو انه يحاول يخلق وهم بديل معتمد علي تبريرات ، سلوك انكاري ، غضب مدفون .. إلخ . 

لكن المهم انه ميعترفش بالأذي !! و لو لسبب ما خلص مصدر الأذي أو توقف عنه ، مش بيفوق بقي لنفسه و يشوف حياته ، لا ده يفضل يعاند و يكابر عشان لا يقر انه اتقل منه !!

فاول خطوة للتحرر من الانسان المؤذي هو اعتراف الانسان قدام نفسه انه اتعرض لأذى ، اتعرض لأهانة ، اتعرض لمشاعر سلبية هو ميستحقهاش !! .. فمش عيب ابدا ان الانسان يبقي في موقف ضعف او انه يكون ضحية لانسان مستغل معندوش مبادئ او قيم .. العيب انه ينكر الحقيقة دية و يتغاضي عن الضرر اللي حصل فيه عشان مش قادر يواجه توابع الحقيقة.

نعم إن أول درجات الخروج " للإفاقة " أنك تقول نفسك كفايه ضرر ، الاعتراف بهذا يضع قدمك على الطريق الصحيح ، لأن الحياة لا تحتمل في الحقيقة Don’t let the same dog bite you twice ( متخليش نفس الكلب يعضك مرتين) .

#نقاش_دوت_نت