ايه الحوار

 - مساء الخير.. 

 - نعم عايز ايه؟ 

-مالك ياعم بتضرب ليه في الكلام؟ 

 -انت اللي مالك؟ 

- مش كنا ارتحنا منك.. وبطلت رخامة علينا.. 

- هههه.. يموت الزمار..

- ارغي عايز ايه دلوقتي؟ 

- يعني ايه حوار جيد

- نعم… حوار يعني تغيب وترجع بحوار

- ياعم قصدي الحوار في الكتابة؟ 

- معلش فهميني؟

- قصدي ازاي نعرف الحوار المكتوب ده حلو ولا وحش؟ 

- سهلة ندوقه..

- ههههههههه 

- بتضحك ليه؟ 

- اصلك عندك حق الحوار الحلو بيتداق كأنه أكلة حلوة أو حلويات. بس المهم يتكتب ازاي حوار حلو؟ 

- أو حادق… 

- قصدي يكتب إزاي الحوار اصلاً؟، وايه الفرق بينه وبين الرغي؟، وايه الفرق بين الحوار في الأشكال المختلفة

- نعم… انت اللي هتجاوب.. ما تبصليش.

- وماله ياعم.. بص تعالي ناخد خطوتين لورا ونفهم. 

- لأ.. 

- الحوار المميز يخرج من الشخصية المميزة يعني لو عملنا شخصية بشكل سليم بكل مواصفاتها، هي نفس هتنطق وتتكلم بحوار مميز ليها. 

- هي هتنطق يعم انت هتجنني .. هي مش خيال هتنطق ازاي؟

- هي خيال فعلاً لكن بتبني وبتعيش في الخيال فعلا زي دون كيشوت وهاملت لما بتكتمل صفات الشخصية الثلاثة النفسية والشكلية والاجتماعية، بتفرض شكل حوار خاص بيها طبعا.  

- طيب ايه الفرق بينه وبين الرغي؟

- الحوار دايما يقدم شئ اما معلومة جديدة او ملمح مختلف او ارتباط جديد بيزود أو بيغير من الأحداث والشخصيات. 

- عايز مثل وبلاش نظريات. 

- اقولك حوار هاملت الشهير "اكون أو لا أكون تلك هي المشكلة؟"  

- مش قلت ده مونولوج.

- ايوه الحوار ده لا يصدر من شخص غير مثقف، ولا يهتم بالفلسفة والمنطق، دا شخص من كتر ما مخه بيفكر جسده نحف.

- قصدك الحوار مناسب جدا شكل وتفكير الشخصية؟  

- طبعا.. في نفس الوقت حوار شخصية سي السيد في ثلاثية نجيب محفوظ حوار واقعي بيستخدم مفردات عصره، مالوش علاقة بالفلسفة.  

- طب سؤال ايه الفرق بين الحوار فى الأشكال المختلفة؟ حتة فذلكة بقي. 

- أقولك الحوار في الكتابة زي القصة القصيرة والرواية والمسرحية مختلف برضه ليه قواعد مناسبته للشخصية والمكان والزمان لكن الفرق مساحته في كل فن فهو تقريبا مش موجود في القصة القصيرة إلا بقدر الاحتياج ، ولكن ليه مساحة مميزة في الرواية، وهو أساس المسرحية لأن المسرح أساساً لغة حوار.     

- هل الحوار بيفرق في الإذاعة والتليفزيون والسينما؟      

- طبعا في السينما الحوار علي القد جداً لدرجة افلام بلا حوار تقريباً زي فيلم ضربة شمس للمخرج محمد خان لأن السينما لغة حركة، أو احيانا الفيلم مافيهوش الا حوار زي فيلم بين السما والارض لصلاح ابو سيف، لكن دا النادر علي مستوي العالم.

- طب والتلفزيون؟  

الحوار مهم جداً لانك بتتفرج علي المسلسل على الفطار ومش مهتم برؤية حركة لكن مهتم بوجود حوار حي متفاعل بين الشخصيات.

٠ كفاية كده عايز انام. 

لسه الحوار في الإذاعة بقي هو كل حاجه، هو الحركة والمكان والزمان وحتى الديكور. 

٠ عايز انام. 

٠ الحوار الحلو هو اللي يعرف امتي يبدأ وازاي يتطور وازاي ينتهي. ايه نمت؟

#نقاش_دوت_نت