ليه الحوار؟

- صباح الخير انت تاني؟.. 

- ياعم مالك بس؟.. اهدي.. عايز أسألك ليه الحوار؟ 

قصدك تسأل نفسك.. انا مش هعبرك

 - ليه الحوار لازم يكون شبه الشخصية يعني يكون بمعجم الشخصية؟  

-معجم الشخصية كمان؟ 

- أيوه يعني مثلاً لو جزار ليه مصطلحات معينة تختلف أكيد لو كان قائد صاروخ. 

-طبعا الا اذا قائد الصاروخ جزار 

-قصدي حوار الشخصية يكون من حياتها وتفكيرها ماتكونش شخصية بوق.

 - نعم.. يعني ايه بوق؟  

- شخصية بيخليها المؤلف تتكلم بلسانه وأفكاره هو، بيوصل من خلالها..  

- حكمته الغاليه وأفكاره القيمه يخي اتلهي.. هههههه 

 - تخيل عندك حق أحياناً المؤلف يبقي مهموم ومشحون ناحية حاجة قوي ويبدأ يكتب نصايح وحكم علي لسان الشخصية 

 زي شخصيات بتتكلم بالحكم بس، تحس كلامها تريند .  

 وشخصيات غير متعلمة بتتكلم باللغة الفصحى.  

- انت قصدك كمان طريقة الكلام ؟

 - قصدي درجة العامية كمان بتختلف باختلاف المكان يعني البدو لهجته غير الصعيدي، والاسكندراني غير الفلاح. 

 - بس ده العادي؟

-طبعا لأ.. لازم تفكر في تطور العامية ومناسبتها لموضوع الكتابة وتحاول ما تقعش في فخ الاستسهلال والكلاشيه.  

- يعني ايه؟  

- الكلاشيه كلام محفوظ من كتر تكراره مابقاش ليه معنى أو أهمية. 

- مش فاهم؟ 

- يعني كلام الشخصية ما يبقاش مكرر أو تقليدي عادي  

- عايز مثل.. 

 - يعني مثلاً الجزار دلوقتي مش لابس جلابية وبيتكلم بالعين والحجاب زي زمان، دا شخصية ثلاثية الأبعاد..  

- طول عرض ارتفاع؟.. 

- صح برضه بس بطريقة مختلفة شكله نفسيته علاقاته.. يعني مثلاً الجزار الطويل اللي ساكن في السيدة زينب، غير الجزار القصير وساكن في كوم الدكة في اسكندرية. 

- على كده الحوار دايما سخن؟ خناقات يعني؟  

- أكيد لأ.. الحوار زي لحن لو علي طول عالي وسخن هتزهق ولو هادي ولطيف دايماً هتزهق برضه.  

-قصدك الحوار لازم يكون متنوع؟

- طبعا.. المواقف طبيعية مش مفتعلة نتيجة تصادم الشخصيات.  

-اقرأ الحادثة.. الحوار الحلو بيلعب على التوازن بين الحدة والايقاع للشخصية وبين اهمية وضرورة وجوده في المكان والزمان والحدث ده. 

- عروستي.. 

-أفهمك يعني مثلاً لو عرف البطل بوجود حل للمشكلة ما ينفعش يعرفه قبل وجود المشكلة نفسها. يعني لازم يدخل يلاقي المشكلة وبعد كده رد فعله على المشكلة وتوتره ورد فعله عليها ثم يلاقي حل…

 - عايز مثل..

- زي فى مدرسة المشاغبين احنا مستنين اللي هيحصل من التلامذة تجاه ابلة عفت، الحوار هنا متوتر مشدود مليان بتوقعات الشخصيات تجاه الموقف من المدرسة لكنه ايضا بيظهر صفات الشخصية وتصادمها مع شخصيات تانية.. يعني مرسي الزناتي هيتصرف بطريقة تختلف عن أحمد الشاعر. 

-مافكرتش قبل كده..

 - الحوار من مهامه الأساسية ضبط إيقاع المشهد.. 

-الايقاع طبلة.. ههههههه

- تقريباً لأنه بيتحكم في سرعة او بطء اداء الممثلين.. 

- خخخ.. 

- انت نمت تصبح على خير

#نقاش_دوت_نت