لماذا رفعت البنوك عوائد الشهادات الآن؟

البنوك بترفع عوائد الشهادات علشان محتاجة ودائع أكتر... تعالى أقولك على السبب 

خلال الأيام الأخيرة شفنا بنوك كبيرة حكومية وخاصة بترفع العائد على الشهادات، وفي شهادات وصلت 19.5% يعني تخطت فائدة البنك المركزي، وناس كتير افتكرت إن دي مجرد منافسة بين البنوك.

لكن الحقيقة إن فيه رقم مهم جدًا بدأ يلفت انتباه القطاع المصرفي... وهو نسبة القروض إلى الودائع 

ببساطة، النسبة دي بتوضح البنك أقرض كام جنيه من كل 100 جنيه مودعة عنده. ولما النسبة ترتفع، يبقى البنك محتاج يجذب ودائع جديدة علشان يقدر يكمل تمويل الشركات والأفراد من غير ما يضغط على السيولة.

وده يفسر ليه بنوك كتير رفعت العائد على الشهادات مؤخرًا... لأنها محتاجة تجذب ودائع جديدة تمول بيها التوسع في الإقراض.

حاليًا النسبة دي وصلت لأكتر من 70%، وده يعتبر مستوى أعلى من اللي البنوك في مصر اتعودت عليه، لأنها فضلت لسنوات بتتحرك بين 45% و55%. لكن في المقابل النسبة دي لسه أقل بعض دول الخليج، اللي بتوصل فيها أحيانًا لأكتر من 100%.

وهذا له  معنيان مهمان.

الأول إيجابي، لأنه بيدل على إن الطلب على التمويل رجع يزيد، وإن البنوك بقت واثقة أكتر في الإقراض، وده بيشير إلى تحسن النشاط الاقتصادي وخروج الاقتصاد تدريجيًا من فترة الضغوط.

أما المعنى التاني، فهو إن البنوك هتحاول بكل الطرق تحافظ على السيولة جوه الشهادات، وده يقلل جزء من الأموال اللي كان ممكن يروح للذهب أو العقارات أو الدولار.

المرحلة الجاية مش هتبقى منافسة بين البنوك بس... دي منافسة على كل جنيه في السوق. 

والسؤال هنا : هل الشهادات هتكسب هذه  الجولة ... ولا الذهب هيرجع يسحب السيولة من جديد؟

#نقاش_دوت_نت